Իլհամ Ալիեւն ընդունել է Իգոր Լեւիտինին
Ադրբեջանի նախագահ Իլհամ Ալիեւն այսօր ընդունել է Ռուսաստանի նախագահ Վլադիմիր Պուտինի օգնական Իգոր Լեւիտինին։ Այս մասին հաղորդում են ադրբեջանական լրատվամիջոցները՝ վկայակոչելով նախագահի պաշտոնական կայքին։
Հանդիպման մանրամասները դեռ չեն հաղորդում։
Պուտինը բաց է ԱՄՆ-ի հետ երկխոսության համար, բայց ՆԱՏՕ-ի հետ բանակցությունների փորձերն անհաջող էին. Պեսկով
Պուտինը բաց է ԱՄՆ-ի հետ երկխոսության համար, բայց ՆԱՏՕ-ի, ԵԱՀԿ-ի եւ ԱՄՆ-ի հետ բանակցությունների փորձերն անհաջող էին։ Այս մասին հայտարարել է ՌԴ նախագահի խոսնակ Դմիտրի Պեսկովը, հաղորդում է «ՌԻԱ Նովոստին»։
«ՌԴ նախագահը միշտ եղել է, կա եւ մնում է բաց բանակցությունների համար՝ հանուն մեր շահերի ապահովման»,-ասել է Պեսկովը։
Նա հիշեցրել է, որ հենց ՌԴ նախագահն էր դեռ հատուկ գործողության մեկնարկից առաջ փորձել բանակցություններ նախաձեռնել ԱՄՆ-ի, ՆԱՏՕ-ի եւ ԵԱՀԿ-ի հետ, սակայն առաջարկը փոխադարձությամբ չի ընդունվել։
Փաստաբանները դիմել են դատարան՝ Սաակաշվիլու պատժի կատարումը հետաձգելու միջնորդությամբ
Վրաստանի նախկին նախագահ Միխայիլ Սաակաշվիլու փաստաբանները դիմել են դատարան՝ պատժի կատարումը հետաձգելու միջնորդությամբ։ Այս մասին հայտարարել է նախկին նախագահի փաստաբան Շալվա Խաչապուրիձեն, հաղորդում է Վրաստանի Առաջին ալիքը։
Նրա խոսքով՝ այս միջնորդությունը դատարան է ներկայացվել Միխայիլ Սահակաշվիլու առողջական վիճակի մասին «Էմպատիա» կենտրոնի եւ միջազգային բժշկական փորձագիտական հանձնաժողովի պատրաստած հաշվետվության հիման վրա:
«Հայցի հիմնական պահանջը պատժից ազատումն է, քանի որ նրա հիվանդությունները ենթակա են առողջապահության նախարարի համապատասխան հրամանի, որը պետությանը պարտավորեցնում է ապահովել պատժից ազատումը: Հայցի հիմնական պահանջը պատժից ազատումն է»,-ասել է նա։
Բելառուսում բողոքի ակցիաների առաջնորդներից մեկը՝ Մարիա Կոլեսնիկովան, գտնվում է վերակենդանացման բաժանմունքում
Բելառուսում բողոքի ակցիաների առաջնորդներից մեկը՝ Մարիա Կոլեսնիկովան, գտնվում է Գոմելի հիվանդանոցում վերակենդանացման բաժանմունքում։
Նախ հաղորդվել է, որ հոսպիտալացման պատճառը հայտնի չէ, սակայն ավելի ուշ տեղեկություն է հայտնվել, որ Կոլեսնիկովային «հիվանդանոց են տեղափոխել վիրաբուժական պաթոլոգիայով եւ վիրահատել»։
«Այժմ նա կայուն ծանր վիճակում է։ Վաղը կտեղափոխվի վիրաբուժական բաժանմունք»,-Facebook-ում հայտնել են նրա աջակիցները։
2021 թվականի սեպտեմբերին Մինսկի դատարանը Կոլեսնիկովային 11 տարվա ազատազրկման է դատապարտել։ Նրան մեղադրել են իշխանության զավթման նպատակով դավադրության, իշխանության զավթման հրապարակային կոչերի եւ «ծայրահեղական կազմավորում» ստեղծելու մեջ։ Կոլեսնիկովան իր դեմ մեղադրանքներն «անհեթեթություն» է անվանել։ Նա հրաժարվել է համագործակցել քննության հետ՝ իր ազատման դիմաց։ Նրա խոսքով՝ իրեն առաջարկել են ելույթ ունենալ պետական հեռուստաալիքով, ինչպես դա արել է NEXTA թելեգրամյան ալիքի նախկին գլխավոր խմբագիր Ռոման Պրոտասեւիչը։
Ավելի վաղ Կոլեսնիկովան աշխատել է Բելառուսի նախագահի թեկնածու Վիկտոր Բաբարիկոյի ընտրական շտաբում։ Բաբարիկոյի ձերբակալությունից հետո ակտիվ մասնակցություն է ունեցել Սվետլանա Տիխանովսկայայի ընտրական արշավում, ապա ընդգրկվել ընդդիմության կոորդինացիոն խորհրդի կազմում։
Կատարում առաջին անգամ նշել են, որ հարյուրավոր միգրանտներ են մահացել աշխարհի առաջնությանը պատրաստվելիս
Կատարի՝ Աշխարհի առաջնություն – 2022-ի անցկացման գերագույն կոմիտեի գլխավոր քարտուղար Հասան ալ-Թավադին ասել է, որ առաջնության օբյեկտների շինարարության ժամանակ մահացած աշխատող միգրանտների թիվը 400-500 է։
«Ըստ գնահատականների՝ մահերի թիվը 400 է։ 400-ի եւ 500-ի միջեւ։ Ստույգ թիվ ես չունեմ։ Մեկ մահն արդեն չափից շատ է։
Ամեն տարի առողջության եւ անվտանգության չափորոշիչներն օբյեկտներում բարելավվում են, համենայն դեպս՝ մեր օբյեկտներում, աշխարհի առաջնության օբյեկտներում, որոնց համար պատասխանատվություն ենք կրում»- ասել է ալ-Թավադին լրագրող Փիրս Մորգանի հարցազրույցում։
Կատարը բազմաթիվ անգամ քննադատվել է մարդու իրավունքների եւ առաջնության անցկացման նպատակով մարզադաշտերի կառուցման ժամանակ աշխատող միգրանտների համար ստեղծված պայմանների հետ կապված։
Աշխարհի առաջնությունը մեկնարկել է նոյեմբերի 20-ին եւ ավարտվելու է 2022թ. դեկտեմբերի 18-ին։ Մրցաշարն անցնում է հինգ քաղաքների ութ մարզադաշտերում։ Եզրափակիչը տեղի է ունենալու «Ազգային մարզադաշտում»։
Ճապոնիան առաջին անգամ հրթիռային գրոհի դեմ ուղղված զորավարժանքներ է անցկացրել
Ճապոնիան առաջին անգամ բալիստիկ հրթիռների արձակման դեպքում բնակչության տարհանման զորավարժանքներ է անցկացրել, տեղեկացրել է Kyodo գործակալությունը։
Նշվել է, որ միջոցառումները տեղի են ունեցել չորեքշաբթի, նոյեմբերի 30-ին, Թայվանի մոտ գտնվող ճապոնական Յոնագունի կղզում։ Բնակիչներին սովորեցրել են հրթիռակոծումից պաշտպանվելու, շչակների ազդանշաններին եւ ռադիոյով արվող նախազգուշացումներին արագ արձագանքելու մեթոդները։ Նշվել է նաեւ, որ զորավարժություններին մասնակցել են Ճապոնիայի կառավարության անդամները։
Ինչպես նշել է ճապոնական գործակալությունը, օգոստոսին Չինաստանի Ժողովրդաազատագրական բանակն այս շրջանում լայնածավալ զորավարժություններ է անցկացրել՝ հրթիռային արձակումներով։ Բալիստիկ հրթիռներից մեկն ընկել է ծովը Յոնագունի կղզուց մոտ 80 կիլոմետր հեռավորությամբ։
Մահացել է Չինաստանի նախկին նախագահ Ցզյան Ցզեմինը
Չորեքշաբթի 96 տարեկանում մահացել է Չինաստանի նախկին նախագահ եւ Չինաստանի Կոմունիստական կուսակցության կենտրոնական կոմիտեի նախկին գլխավոր քարտուղար Ցզյան Ցզեմինը։ Այս մասին հայտնում է Չինաստանի կենտրոնական հեռուստատեսությունը։
Ցզյան Ցզեմինը, «ով հիվանդ էր լեյկոզով եւ ներքին օրգանների ֆունկցիոնալ անբավարարությամբ, մահացել է 2022 թվականի նոյեմբերի 30-ին՝ տեղական ժամանակով 12:13-ին, Շանհայում»։
Ցզյան Ցզեմինը ծնվել է 1926 թվականի օգոստոսի 17-ին Չինաստանի արեւմտյան Ցզյանսու նահանգում։ 1989 թվականի հունիսից զբաղեցրել է Կոմունիստական կուսակցության կենտրոնական կոմիտեի գլխավոր քարտուղարի պաշտոնը։ 1993-2003 թվականներին եղել է Չինաստանի նախագահը։
Հայ դատի հանձնախումբը ԱՄՆ Կոնգրեսին կոչ է արել Արցախին 50 մլն դոլարի օգնություն հատկացնել
Ամերիկայի Հայ դատի հանձնախումբը ԱՄՆ-ի օրենսդիրներին կոչ է անում քննարկվող տարեվերջյան ծախսերի փաթեթում ընդգրկել Արցախին 50 միլիոն դոլարի օգնության փաթեթը:
Սենատի արտաքին հարաբերությունների հանձնաժողովի նախագահ Բոբ Մենենդեսին հասցեագրված նամակում Ամերիկայի Հայ դատի հանձնախմբի նախագահ Րաֆֆի Համբարյանը ամերիկահայ համայնքի և կոալիցիոն գործընկերների անունից շնորհակալություն է հայտնել նրան Կովկասում ԱՄՆ քաղաքականության վերաբերյալ վերջին լսումների համար:
Լսումների ընթացքում Բոբ Մենենդեսն անընդունելի էր անվանել Վաշինգտոնի ռազմական աջակցությունն Ադրբեջանին և արցախահայերին օգնություն չուղարկելը:
Սենատի արտաքին հարաբերությունների հանձնաժողովի նախագահ Մենենդեսին ուղղված նամակում նաև նշվում է հետևյալը. «Ինչպես ցավալիորեն երևաց Ձեր լսումների ժամանակ, ԱՄՆ-ի ներկայիս ներգրավվածությունը տարածաշրջանում ղեկավարվում է նավթով հարուստ Ադրբեջանի կողմից՝ կոռումպացված բռնապետություն, որին Բայդենի վարչակազմը թույլ է տվել թելադրել ԱՄՆ-ի քաղաքականությունը»։
Կոնգրեսի հայկական հանձնախմբի հիմնադիր համանախագահ Ֆրենկ Փալոնին հղած նամակում Համբարյանը շեշտել է. «Ինչպես գիտեք, Բայդենի վարչակազմը, ինչպես և նախկինում Թրամփի վարչակազմն Ադրբեջանի ճնշման տակ Արցախին ԱՄՆ մարդասիրական օգնությունն արգելափակելու անխոհեմ և անպատասխանատու քաղաքականություն են վարել՝ չնայած այնտեղ դրա լուրջ կարիքին, ինչպես նաև երկու կուսակցությունների լայն աջակցությանը, որն այս օգնության ծրագիրը վայելում է Կոնգրեսի երկու պալատներում։ Արցախին ԱՄՆ-ի օգնության դեմ Ադրբեջանի վետոյի վերացումը Ամերիկայի Հայ դատի հանձնախմբի և մեր համայնքի և կոալիցիոն գործընկերների համար օրենսդրական գերակայություն է»:
Սեպտեմբերին կոնգրեսական Փալոնը և Նևադայի կոնգրեսական Դինա Տիտուսը Կոնգրեսի ավելի քան 45 անդամների աջակցությամբ դիմել էին ԱՄՆ պետքարտուղար Էնթոնի Բլինքենին և ԱՄՆ Միջազգային զարգացման գործակալության (USAID) ադմինիստրատոր Սամանթա Փաուերին` կոչ անելով «անհապաղ քայլեր ձեռնարկել՝ հատկացնելով զգալի ռեսուրսներ» վտանգի տակ գտնվող Արցախի հայ բնակչությանն աջակցելու համար:
Կիևում հոսանքի անջատումները կարող են շարունակվել մինչև գարուն. Կլիչկո
Կիևի քաղաքապետ Վիտալի Կլիչկոն հայտնել է, որ անցյալ շաբաթ գնդակոծության հետևանքով վնասվել են Ուկրաինայի տարբեր շրջաններում գտնվող կարևոր էներգետիկ օբյեկտներ։ Նա քաղաքացիներին հորդորել է պատրաստվել նրան, որ հոսանքազրկումները կշարունակվեն մինչև գարուն, ինչպես նաև չի բացառել քաղաքի մասնակի տարհանումը։
ՌԲԿ «Ուկրաինա»-ին տված հարցազրույցում Կլիչկոն ասել է, որ Կիևում էլեկտրամատակարարումն արդեն ամբողջությամբ վերականգնվել է, սակայն համաուկրաինական էլեկտրացանցում սակավության պատճառով անջատումներ են իրականացվում։
«Անջատումները կարող են լինել մինչև գարուն։ Սա նաև կապված է ցածր ջերմաստիճանի հետ… ցուրտ եղանակին մարդիկ միշտ ավելի շատ էլեկտրաէներգիա են սպառում»,- պարզաբանել է քաղաքապետը։
Կլիչկոն նաև նշել է, որ Կիևը կարող է մասամբ տարհանվել։
Կիևում արդեն բացվել է 430 ջեռուցման կետ։ Կլիչկոն կոչ է արել քաղաքացիներին մթերել սնունդ և ջուր, ինչպես նաև ունենալ տաք հագուստ, լիցքավորված դյուրակիր համակարգիչներ և քարտեզներ ներբեռնել հեռախոսներում։
Նոյեմբերի 23-ին Ուկրաինայի նախագահ Վլադիմիր Զելենսկին հայտարարել է, որ երկրի տարածքը ենթարկվել է Ռուսաստանի զանգվածային հարվածների։ ՄԱԿ-ում Ռուսաստանի մշտական ներկայացուցիչ Վասիլի Նեբենզյան այս հարվածներն անվանել է պատասխան «արևմտյան զենքի մատակարարմանը»։
Հռոմի պապը Իսրայելին եւ Պաղեստինին երկխոսելու կոչ է արել
Հռոմի պապ Ֆրանցիսկոսը Իսրայելի եւ Պաղեստինի կառավարություններին կոչ է արել ավելի շատ ջանքեր գործադրել Երուսաղեմում վերջերս տեղի ունեցած ռումբերի պայթյուններից եւ Արեւմտյան ափի բախումներից հետո երկխոսություն սկսելու համար, տեղեկացրել է Reuters-ը։
Ելույթ ունենալով Սուրբ Պետրոսի հրապարակում՝ հովվապետն ասել է, որ բռնությունն «սպանում է ապագան» երկու կողմերի համար։
Նոյեմբերի 23-ին Երուսաղեմում տեղի ունեցավ երկու պայթյուն։ Առաջինը՝ կենտրոնական ավտոբուսային կայանի մոտ, երկրորդը՝ մի քանի րոպե հետո, քաղաքի հյուսիսում։ Նախնական տվյալներով՝ պատահարների հետեւանքով զոհվել է մի պատանի, եւս 19 մարդ վիրավորվել է։ Իսրայելի ոստիկանության կարծիքով՝ դրանք համակարգված ահաբեկչական գրոհներ էին։ Իրավապահ մարմինները կալանավորել են երեք պաղեստինցու, որոնց կասկածում են պայթյունների հետ կապ ունենալու մեջ։
Jerusalem Post թերթը գրել է, որ ավտոբուսի կանգառում եւ Երուսաղեմի ավտոբուսում պայթած ռումբերը լցված էին մեխերով եւ գործի են դրվել հեռահար կառավարմամբ։