Խուլիգանության մասնակից 7 երիտասարդներին տարել են ոստիկանության բաժին

Դեկտեմբերի 4-ին, ժամը 00.25-ին, ոստիկանության պարեկային ծառայության գնդի 3-րդ գումարտակի 1-ին վաշտի ծառայողները մայրաքաղաքի Պարոնյան փողոցում հայտնաբերել, խուլիգանություն կատարելու հիմնավոր կասկածանքով ձերբակալել և Կենտրոնական բաժին են տեղափոխել յոթ երիտասարդների:

Ոստիկանությունիցհայտնում են, որ նրանք, բացահայտ անհարգալից վերաբերմունք դրսևորելով հասարակության նկատմամբ և խախտելով հասարակական կարգը, վիճաբանում և հարվածներ էին հասցնում իրար:
Նախապատրաստված նյութերը փոխանցվել են քննչական բաժին:

«Չելսին» ցանկանում է ձեռք բերել «Ինտերի» կիսապաշտպանին

Լոնդոնի «Չելսին» հետաքրքրված է Իտալիայի փոխչեմպիոն Միլանի «Ինտերի» 25-ամյա իտալացի կիսապաշտպան Նիկոլո Բարելայի ծառայություններով, հաղորդում է Calciomercatoweb-ը։

Մեծ է հավանականությունը, որ հաջորդ ամռանը «Չելսիից» կհեռանան կիսապաշտպաններ, իտալացի Ժորժինյոն եւ ֆրանսիացի Նգոլո Կանտեն։ Բարելան համարվում է արժանի փոխարինող։

«Ինտերը» պատրաստ է քննարկել Բարելայի տրանսֆերը, եթե ստանա 80 միլիոն եվրոյից սկսվող առաջարկներ։ «Չելսին» կփորձի գործարքում ներառել բելգիացի հարձակվող Ռոմելու Լուկակուի վաճառքը։ Նա այժմ վարձակալությամբ է հանդես գալիս «Ինտերում»։

Բարելան 2020 թվականին իտալական «Կալյարիից» է տեղափոխվել «Ինտեր»։ Ընթացիկ մրցաշրջանում նա «Ինտերի» հետ բոլոր մրցաշարերում մասնակցել է 25 հանդիպման, խփել 7 գոլ, կատարել 6 գոլային փոխանցում։

Բժիշկ Արման Նազինյանի մահվան դեպքի առթիվ նախաձեռնվել է քրեական վարույթ սպանության հատկանիշներով

Քննչական կոմիտեի նախագահի մամուլի քարտուղար Գոռ Աբրահամյանը իր ֆեյսբուքյան գրառմամբ տեղեկացնում է․

«Աստղիկ» բժշկական կենտրոնի բժիշկ Արման Նազինյանի մահվան դեպքի առթիվ նախաձեռնվել է քրեական վարույթ սպանության հատկանիշներով։ Ըստ առկա տվյալների՝ անձը մահացել է իր տանը, հարազատների ներկայությամբ։

Քրեական վարույթը նշված հատկանիշով նախաձեռնվել է այն պատճառով, որ ի տարբերություն նախորդ «Քրեական դատավարության» օրենսգրքի իրավակարգավորումների, երբ նախ նախապատրաստվում էին նյութեր, ապա դրանից հետո միայն բավարար հիմքերի առկայությամբ լուծվում էր ՀՀ քրեական օրենսգրքի այս կամ այն հոդվածով քրեական գործ հարուցելու հարցը, նոր օրենսգրքով դեպքի առթիվ հաղորդումն ստանալուց հետո նախաձեռնվում է քրեական վարույթ՝ ՀՀ քրեական օերնսգրքի համապատասխան հոդվածով․ հանկարծամահության դեպքերով, ինչպես տվյալ պարագայում՝ առերևույթ սպանության հատկանիշներով։

Եվ միայն քննության արդյունքնում, մահվան պատճառները պարզվելուց հետո է դեպքին տրվում վերջնական իրավական գնահատականը։ Տվյալ դեպքը ևս բացառություն չի կարող լինել։ Հետևաբար, նաև հետագայի համար, խնդրում եմ լրագրող գործընկերներիս, ինչպես նաև սոցիալական ցանցերի օգտատերերին նմանատիպ իրավիճակներում, հաշվի առնելով նաև հարցի էթիկական կողմը, անձանց մահվան դեպքերում խուսափել հեռուն տանող հետևություններ ու եզրակացություններ անելուց և հիմք ընդունել միայն վարույթն իրականացնող մարմնի կողմից տրվող տեղեկատվությունը կամ պարզաբանումը։

Այս դեպքի առնչությամբ էլ համապատասխան քննչական, վարույթային գործողությունների ավարտից հետո ՀՀ քննչական կոմիտեն որևէ ձևաչափով կտա պարզաբանում։

Ստեփանավանի ոլորանները և Վանաձոր-Թումանյան ճանապարհը դժվարանցանելի են բոլոր տրանսպորտային միջոցների համար

«Ճանապարհային դեպարտամենտ» հիմնադրամը տեղեկացնում է, որ դեկտեմբերի 5-ին՝ ժամը 12։30-ի դրությամբ, առատ ձյան պատճառով Ստեփանավանի ոլորանները և Վանաձոր-Թումանյան ավտոճանապարհը դժվարանցանելի են բոլոր տեսակի տրանսպորտային միջոցների համար։

Միջպետական և հանրապետական նշանակության մյուս ավտոճանապարհները բաց են:

«Ճանապարհային դեպարտամենտ» հիմնադրամից հորդորում են լինել ուշադիր, խստագույնս պահպանել ճանապարհային երթևեկության կանոնները և երթևեկել բացառապես ձմեռային անվադողերով։

19-ամյա «սոված» երիտասարդը հարևանի տնից գողացել էր ոսկյա մատանիներ եւ պահածո

Դեկտեմբերի 2-ին ոստիկանության Կապանի բաժնում հաղորդում տված քաղաքացին հայտնել էր, որ նոյեմբերի 30-ի ժամը 07.00-ից ժամը 17.00-ն ընկած ժամանակահատվածում ապօրինի մուտք են գործել Երկաթուղայինների 5-րդ նրբանցքի իր տուն և գողացել ոսկյա մատանիներ ու պահածո:

Ոստիկանությունից հայտնում են, որ Կապանի ոստիկանների ձեռնարկած օպերատիվ-հետախուզական միջոցառումների արդյունքում պարզվել է, որ գողությունն արել է տուժողի հարևանի 19-ամյա որդին:
19-ամյա երիտասարդը ձերբակալվել, տեղափոխվել է բաժին, որտեղ խոստովանել է, որ հարևանի տնից ինքն է գողություն արել:

Գողոնը հայտնաբերվել է:

Կազմված փաստաթղթերն ուղարկվել են Սյունիքի մարզի քննչական վարչություն:

Ժիրու․ Մբապեի հետ խաղալը երջանկություն է

Ֆրանսիայի հավաքականի եւ Իտալիայի չեմպիոն «Միլանի» 36-ամյա հարձակվող Օլիվիե Ժիրուն խոսել է ազգային թիմում ՊՍԺ-ի 23-ամյա հարձակվող Կիլիան Մբապեի հետ խաղի մասին։

Նախկինում Ժիրուն ու Մբապեն ունեին լարված հարաբերություններ։ Ժիրուն դժգոհ էր, որ Մբապեն քիչ է փոխանցումներ կատարում իրեն։
Աշխարհի առաջնության 1/8 եզրափակիչում Ժիրուն գոլի հեղինակ է դարձել Մբապեի փոխանցումից հետո եւ 52 գոլով դարձել Ֆրանսիայի հավաքականի բոլոր ժամանակների լավագույն ռմբարկուն՝ հետ թողնելով Թիերի Անրիին։ Ֆրանսիան 3:1 հաշվով պարտության էր մատնել Լեհաստանի թիմին, Մբապեն դարձել էր դուբլի հեղինակ։

«Մի փոքր հիասթափված եմ, որ հանդիպման սկզբում չկարողացա գոլի վերածել Մբապեի մեկ կամ երկու փոխանցումը խաղից։ Շատ էի ցանկանում գոլ խփել։ Մբապեն հրաշալի է գտնում ինձ իր փոխանցումներով։ Նրա հետ խաղալը երջանկություն է»,- Ժիրուի խոսքը մեջբերում է GFFN-ը։

Քառորդ եզրափակիչում Ֆրանսիան դեկտեմբերի 10-ին կմրցի անգլիացիների հետ, որոնք 3:0 հաշվով հաղթել են Աֆրիկայի չեմպիոն Սենեգալի թիմին։

Ստեփանակերտում լուսացուցային օբյեկտներ են տեղադրվել

Մայրաքաղաք Ստեփանակերտի բանուկ խաչմերուկներում հնարավոր ճանապարհատրանսպորտային պատահարները կանխարգելելու, ինչպես նաև երթևեկությունն առավել արդյունավետ կարգավորելու նպատակով, Ստեփանակերտի քաղաքապետարանը՝ ճանապարհային ոստիկանության հետ համատեղ համապատասխան հետազոտություն անցկացնելուց հետո որոշել են Անդրանիկ-Մարտունի և Մարտունի-Շահեն Դանիելյան փողոցների խաչմերուկներում տեղադրել լուսացուցային օբյեկտներ։

Նշված խաչմերուկներում արդեն մի քանի օր է տեղադրվել և շահագործման են հանձնվել ժանակակից հագեցվածությամբ լուսացույցները:

Հնարավոր ճանապարհատրանսպորտային պատահարները կանխարգելելու նպատակով ճանապարհային ոստիկանությունը կո՜չ է անում խստագույնս հետևել լուսացույցի ազդանշանին և անշեղորեն պահպանել երթևեկության կանոնները։

Տրանսպորտային համակարգի բարեփոխման շրջանակում առաջիկայում նախատեսվում է նոր լուսացույցներ՝ այդ թվում հետիոտնի, տեղադրել մայրաքաղաքի մի շարք փողոցների խաչմերուկներում:

Մեսի․ Արգենտինան ապացուցեց, որ ուժեղ ֆուտբոլային երկիր է

Ամերիկայի գավաթակիր Արգենտինայի հավաքականի եւ փարիզյան ՊՍԺ-ի 35-ամյա հարձակվող Լիոնել Մեսին գնահատել է Քաթարում ընթացող աշխարհի առաջնության մակարդակը։

«Ինձ զարմացրեց Գերմանիայի ձախողումը։ Նրանք ունեն շատ լավ խաղացողներ, շատ երիտասարդ թիմ է։ Զարմանալի է, որ նրանք դարձյալ չհաղթահարեցին խմբային փուլի արգելքը, բայց այս մրցաշարը ցույց է տալիս, թե ինչքան է հավասարվել թիմերի խաղամակարդակը։
Արգենտինան ապացուցեց, որ ուժեղ ֆուտբոլային երկիր է, որը միշտ լավագույնների թվում է։ Մենք գիտեինք, որ ֆավորիտների թվում ենք, բայց դա պետք էր ապացուցել նաեւ խաղադաշտում։ Այժմ փոքր քայլերով շարժվում ենք առաջ։

Իհարկե, մենք տեսնում ենք, թե ինչ է կատարվում մյուս խաղերում։ Բրազիլիան մնում է գլխավոր ֆավորիտը, թեեւ պարտվեցին Կամերունին։ Ֆրանսիան նույնպես ֆավորիտ է։ Իսպանիան շատ լավ է խաղում, նրանք նույնպես փլեյ-օֆֆում են»,- Մեսիի խոսքը մեջբերում է Ole-ն։

Արգենտինայի հավաքականը 1/8 եզրափակիչում 2:1 հաշվով հաղթել է ավստրալացիներին եւ քառորդ եզրափակիչում կմրցի Նիդեռլանդների թիմի հետ։ Այդ հանդիպումը տեղի կունենա դեկտեմբերի 9-ին եւ կմեկնարկի Երեւանի ժամանակով 23:00-ին։

Օդի ջերմաստիճանը կբարձրանա 5-7 աստիճանով

Երևանում այսօր ցերեկը, դեկտեմբերի 6-10-ը սպասվում է առանց տեղումների եղանակ։

Մարզերում այսօր ցերեկը, դեկտեմբերի 6-ին, 7-ին առանձին շրջաններում սպասվում է թույլ ձյուն և մառախուղ: Դեկտեմբերի 8-10-ը սպասվում է առանց տեղումների եղանակ: Քամին՝ հյուսիսարևելյան` 2-5մ/վ:

Օդի ջերմաստիճանը դեկտեմբերի 8-10-ն աստիճանաբար կբարձրանա 2-3, Լոռիում, Տավուշում, Սյունիքում և Արցախում՝ 5-7 աստիճանով:

Արցախում այսօր և վաղը սպասվում է առանց տեղումների եղանակ։

Արմավիրի մարզում իր տան բակում, ծառից կախված հայտնաբերվել է Արցախյան 44-օրյա պատերազմի 33-ամյա մասնակցի դին

Արմավիրի մարզում այսօր՝ դեկտեմբերի 5-ին, ժամը 11։00-ի սահմաններում ոստիկանության Վաղարշապատի բաժին ահազանգ է ստացվել, որ Արմավիրի մարզի բնակավայրերից մեկի սեփական տանը ծառից կախված դի կա։

Shamshyan.com-ի հաղորդմամբ, ոստիկաններն ու քննիչները նշված տան բակում հայտնաբերել են նույն տան բնակիչ 33-ամյա Կարո Կ․-ի դին։

 Դեպքի փաստով՝ Վաղարշապատի քննչական բաժնում նախաձեռնվել է քրեական վարույթ։

Կայիք տեղեկություններով՝ մահացածը Արցախյան 44-օրյա պատերազմի մասնակից էր։