Տիգրան Հեքեքյանն ազատվել է Սայաթ-Նովայի անվան երաժշտական դպրոցի տնօրենի պաշտոնից
Երևանի քաղաքապետի՝ օգոստոսի 16-ի որոշմամբ՝ Տիգրան Արտյոմի Հեքեքյանն ազատվել է «Երևանի Սայաթ-Նովայի անվան երաժշտական դպրոց» համայնքային ոչ առևտրային կազմակերպության տնօրենի պաշտոնից։
«Ղեկավարվելով Հայաստանի Հանրապետության աշխատանքային օրենսգրքի 109-րդ հոդվածի 1-ին մասի 3-րդ կետով, 3-րդ մասի 4-րդ կետով, 112-րդ հոդվածով, 130-րդ հոդվածի 1-ին մասով, «Պետական ոչ առևտրային կազմակերպությունների մասին» օրենքի 15-րդ հոդվածի 1-ին մասով, 16-րդ հոդվածի 3-րդ մասի «ա» ենթակետով, 5-րդ մասով, «Երևան քաղաքում տեղական ինքնակառավարման մասին» օրենքի 52-րդ հոդվածի 1-ին մասի 6-րդ կետով և հիմք ընդունելով Տիգրան Հեքեքյանի դիմումը՝ 1. Տիգրան Արտյոմի Հեքեքյանին՝ 2024 թվականի օգոստոսի 14-ից ազատել «Երևանի Սայաթ-Նովայի անվան երաժշտական դպրոց» համայնքային ոչ առևտրային կազմակերպության տնօրենի պաշտոնից՝ աշխատանքային վերջին օր համարելով 2024 թվականի օգոստոսի 14-ը»,- նշված է որոշման մեջ։ Այն ստորագրել է Երևանի քաղաքապետի առաջին տեղակալ, Երևանի քաղաքապետի պարտականությունները կատարող Արմեն Փամբուխչյանը։
Քաղաքապետի մեկ այլ որոշմամբ՝ Գարիկ Ռոբերտի Նազարյանը 2024 թվականի օգոստոսի 15-ից նշանակվել է «Երևանի Սայաթ-Նովայի անվան երաժշտական դպրոց» համայնքային ոչ առևտրային կազմակերպության տնօրենի թափուր պաշտոնում՝ որպես ժամանակավոր պաշտոնակատար՝ մինչև սահմանված կարգով տնօրենի թափուր պաշտոնը մրցույթի արդյունքում հաղթող ճանաչված մասնակցի կողմից զբաղեցվելը:
Ե՞րբ կստորագրվի խաղաղության պայմանագիրը Հայաստանի և Ադրբեջանի միջև
Վերջին շրջանում ամենից շատ հնչող հարցը՝ ե՞րբ կստորագրվի այսպես կոչված խաղաղության պայմանագիրը Հայաստանի և Ադրբեջանի միջև և ինչպիսի զարգացումներ կարելի է ակնկալել այս գործընթացի շուրջ: Քաղաքագետ Արման Ղուկասյանի կանխատեսմամբ՝ մոտ ապագայում խաղաղության պայմանագրի հնարավոր ստորագրումը քիչ հավանական է, և շատ բան կախված է նաև միջազգային իրավիճակից։ Ըստ նրա՝ չնայած ՀՀ և Ադրբեջանի միջև հարաբերությունների կարգավորման գործընթացը շարունակվում է, այդուհանդերձ առաջընթացի տեմպերը դանդաղում են.
«Այդպես, երկու երկրների ղեկավարները հրաժարվեցին Լոնդոնում երկկողմ հանդիպում անցկացնել ԵԽ նախագահ Շառլ Միշելի միջնորդությամբ։ Երեւանի եւ Բաքվի միջեւ Արեւմուտքի միջնորդությամբ երկխոսությունը որոշակի փակուղի է մտնում : Հուլիսի 1-ին խաթարվեց նաև սահմանազատման գործընթացը, և ակնհայտ է, որ Ալիևը չի շտապում խաղաղության պայմանագիր կնքել, քանի որ ցանկանում է ստանալ առավելագույնը, հատկապես այն պայմաններում, երբ միջազգային խաղացողները՝ միջազգային օրակարգով պայմանավորված զբաղված են այլ ոլորտներում»,- լրագրողների հետ հանդիպմանն ասաց նա։
Նա մատնանշեց, որ արևմտյան միջնորդների կարծիքով՝ խաղաղ պայմանագրի նախագծի մեծ մասը համաձայնեցված է կողմերի միջև, բայց առաջ շարժվելու համար անհրաժեշտ է քաղաքական կամք։
«Ալիևի հիմնական նպատակն այս փուլում նաև այսպես կոչված «Զանգեզուրի միջանցքը» ստանալն է, որը շատ միջազգային խաղացողների շահերի տիրույթում է։ Վերջերս ԱՄՆ-ն բացահայտ հայտարարեց, որ միջանցքն անհրաժեշտ է, քանի որ այն Կենտրոնական Ասիայի երկրներին թույլ կտա նվազեցնել իրենց կախվածությունը Չինաստանից և Ռուսաստանից՝ շրջանցելով այդ երկրները, Հայաստանի և Ադրբեջանի տարածքներով դուրս գալ համաշխարհային շուկաներ: Միջանցքի խնդիրն այժմ առաջնահերթություն է Ալիևի համար, սակայն այստեղ բախվում են բազմաթիվ խոշոր խաղացողների շահերը՝ ի դեմս ՌԴ, Արևմուտքի, Թուրքիայի, Իրանի և Չինաստանի, ինչը նույնպես ազդում է խաղաղության պայմանագրի ստորագրման գործընթացի վրա»,- ընդգծեց բանախոսը, ապա ավելացրեց, որ որոշ տեղեկությունների համաձայն՝ նոր Սահմանադրության ընդունման հարցը հետին պլան է մղվել, և, ամենայն հավանականությամբ, այն կընդունվի միայն 2026 թվականին Հայաստանում կայանալիք խորհրդարանական ընտրություններից հետո։
«Այսպիսով, կարելի է կանխատեսել, որ մոտ ապագայում խաղաղության պայմանագրի հնարավոր ստորագրումը քիչ հավանական է, շատ բան կախված է նաև միջազգային իրավիճակից։ Վերոնշյալին գումարվում է նաև Իրանի և Իսրայելի միջև հակամարտության էսկալացիայի մեծ հավանականությունը, որը նույնպես կարող է լուրջ ազդեցություն ունենալ տարածաշրջանի վրա, և այս դեպքում Ալիևը կարող է փորձել օգտվել իրավիճակից ու նոր սադրանքների դիմել միջանցքը ստանալու համար։ Կան չափազանց շատ անորոշ գործոններ, որոնք կարող են ազդել գործընթացի վրա, սակայն համաձայնագրի արագ ստորագրում պետք չէ սպասել»,- ընդգծեց նա։
Արման Ղուկասյանը մատնանշեց այն փաստը, որ չնայած ամառային շրջանին, Հայաստանի շուրջ շարունակվում են շատ հետաքրքիր իրադարձություններ տեղի ունենալ: Նրա խոսքով, «շատ բան պարզ է դառնում, և որոշ արտաքին խաղացողներ սկսել են դիմակները հանել և բացահայտ խոսել Հարավային Կովկասում իրենց հավակնությունների մասին.
«Եվ դա տեղի է ունենում Արևմուտքի միջնորդությամբ Երևանի և Բաքվի միջև, այսպես կոչված, հարաբերությունների կարգավորման գործընթացի շրջանակներում»:
Ապա շարունակեց. «ԱՄՆ-ն այլևս չի թաքցնում իր մտադրությունները և հայտարարում է Սյունիքում միջանցք ստեղծելու անհրաժեշտության մասին, ինչը հակասում է Հայաստանի շահերին: Ամերիկացիներն էլ ավելի հեռուն գնացին և բացահայտ ձևակերպեցին հետևյալը. «Հայաստանի և Ադրբեջանի միջև խաղաղության պայմանագրի կնքումը հնարավոր է, բայց դրա համար անհրաժեշտ է, որպեսզի կողմերը կատարեն բարդ ընտրություններ և բարդ փոխզիջումների գնան»։ Այս մասին օրերս հայտարարել է ԱՄՆ Պետքարտուղարության պաշտոնական ներկայացուցիչ Մեթյու Միլլերը։ Միաժամանակ նա ընդգծել է, որ Վաշինգտոնը կանգ չի առնի, քանի դեռ համաձայնություն ձեռք չի բերվել։ Ստացվում է, որ սկզբում Արևմուտքը միլիոնավոր դոլարներ է ներդրել հայկական տեղեկատվական դաշտում, որպեսզի մեղադրի Ռուսաստանին միջանցք ստանալու ցանկության մեջ, իսկ հիմա նույն միջանցքն է ակնկալում»,- նշեց նա։
Ամերիկացիները, շարունակեց քաղաքագետը, վերջերս հայտարարություն արեց, որ միջանցքը Հայաստանով և Ադրբեջանով անհրաժեշտ է, որպեսզի Կենտրոնական Ասիայի երկրները դուրս գան համաշխարհային շուկաներ՝ շրջանցելով Ռուսաստանը և Չինաստանը, ինչը կնվազեցնի Կենտրոնական Ասիայի կախվածությունը այս երկրներից։ Հիմա բոլորին պետք է պարզ լինի, որ Արևմուտքի համար Հայաստանն ընդամենը գործիք է Ռուսաստանի և Չինաստանի դեմ՝ անգլո-սաքսոնների արտաքին քաղաքական հավակնությունների իրականացման համար։
«Այս ամենի ֆոնին Փաշինյանին, ամենայն հավանականությամբ, Եվրամիությունից ազդանշան է տրվել, որ ԵՄ-ում Հայաստանին ոչ ոք չի սպասում, և այդ պատճառով ՀՀ վարչապետը հրաժարվել է անդամակցության հարցով հանրաքվե անցկացնելու մտքից։ Նիկոլ Փաշինյանը կողմ էր ԵՄ-ին անդամակցելու հարցով հանրաքվեի անցկացմանը, սակայն հետագայում հրաժարվեց այդ մտքից՝ պատճառաբանելով, որ հարցեր ունի, որոնց ԵՄ-ից պատասխաններ չի ստացել, և կարծես թե հետ է կանգնում հանրաքվեի գաղափարից։ Փաշինյանը հիանալի հասկանում է, որ Հայաստանը ԵՄ-ում սպասելի չէ և, ամենայն հավանականությամբ, Փաշինյանը չի պատրաստվում լուրջ արտաքին քաղաքական հետընթացներ անել՝ Արևմուտքից սպասվող իրական այլընտրանքի բացակայության պատճառով։ Հենց դրանով կարելի է բացատրել այն փաստը, որ Երևանը չի շտապում դուրս գալ ՀԱՊԿ-ից և դուրս բերել 102-րդ ռուսական բազան»,- ասաց նա։
Ըստ Ղուկասյանի՝ պարզ է, որ Հայաստանը նույնպես դուրս չի գա ԵԱՏՄ-ից, քանի որ կա չոր տնտեսական հաշվարկ. ինչպե՞ս է Հայաստանը արտահանելու, ինչպես դա տեղի է ունենում այսօր ԵԱՏՄ-ին անդամակցելու շրջանակներում, քանզի հայկական արտադրությունը կկանգնի բազմաթիվ խնդիրների առջև եվրոպական շուկա մուտք գործելիս, ինչը շատ ավելի թանկ է, նաև թե՛ եվրոպական չափանիշներին համապատասխանելու, թե՛ տրանսպորտային հաղորդակցության բացակայության առումով։
Ղուկասյանը հիշեցրեց, որ ԵԱՏՄ-ին անդամակցության շրջանակներում Հայաստանն այսօր առաջատարն է անդամ երկրների շարքում տնտեսական աճի տեմպերով։ Այսպես, ըստ պաշտոնական վիճակագրության, 2023 թվականին Հայաստանում գրանցվել է տնտեսական ակտիվության 9,4 տոկոս աճ, իսկ ՀՆԱ-ն աճել է 8,5 տոկոսով։ Արտահանումն աճել է 55,3%-ով, ներմուծումը՝ 40,2%-ով։ Միայն վերջին երկու տարվա ընթացքում Հայաստանից արտահանումն աճել է 2,8 անգամ, ներմուծման ծավալները՝ 2,3 անգամ։
«Կարծում եմ, որ Փաշինյանը մոտ ապագայում չի համաձայնի ԵՄ-ին անդամակցելու վերաբերյալ հանրաքվե անցկացնել, և այդ գործընթացը երկար կձգձգվի, իսկ հակառուսական կուրսը երկրում սուր դրսևորումներ չի ունենա և ամենը կշարունակվի առանց լուրջ շրջադարձերի”,- եզրափակեց քաղաքագետը:
Վայքում վթարային ջրանջատում կլինի
«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ վթարային աշխատանքներով պայմանավորված, օգոստոսի 9-ին ժամը 11:00-14:00-ն կդադարեցվի ք.Վայք Ջերմուկի Խճ. 41-71/1 տների ջրամատակարարումը:
Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:
Մարտաֆիլմ հիշեցնող կրակոցներ՝ Սևանի հանգստյան գոտում․ կա 1 զոհ, 2 վիրավոր
Երեկ՝ հուլիսի 17-ին կրակոցներ, սպանություն, սպանության փորձի դեպք է տեղի ունեցել Գեղարքունիքի մարզում։ Ժամը 22։00-ի սահմաններում ՀՀ ներքին գործերի նախարարության ոստիկանության քրեական ոստիկանությունում, ոստիկանության Գեղարքունիքի մարզային վարչությունում և ոստիկանության Սևանի բաժնում միաժամանակ օպերատիվ տեղեկություններ են ստացվել, որ Երևան-Սևան ավտոճանապարհի Սևանի վարչական տարածքում գործող «Best Western Bohemian Resort» հանգստյան գոտում կրակոցներ են հնչել և կան վիրավորներ։
Ինչպես դեպքի վայրից հայտնում է ֆոտոլրագրող Գագիկ Շամշյանը, դեպքի վայր են ժամանել ՀՀ ՆԳՆ ոստիկանության պետի տեղակալ Վարդան Վարդանյանը, ՀՀ ՆԳՆ ոստիկանության քրեական ոստիկանության գլխավոր վարչության պետի առաջին տեղակալ Արմեն Պետրոսյանը, քրեական ոստիկանության գլխավոր վարչության մարդու դեմ ուղղված հանցագործությունների դեմ պայքարի վարչության պետ Վահե Մուշեղյանը, նույն վարչության մարդու դեմ ուղղված հանցագործությունների դեմ պայքարի բաժնի պետ Ռոման Խլխաթյանը, ոստիկանության Գեղարքունիքի մարզային վարչության պետ Արթուր Զոհրաբյանը, վարչության պետի օպերատիվ գծով տեղակալ Տիգրան Պետրոսյանը և ոստիկանության Սևանի բաժնի պետ Սուրիկ Ջանիկյանն ու բաժնի պետի օպերատիվ գծով տեղակալ Կարեն Ավետիսյանը։
Մինչ ոստիկանները կժամանեին դեպքի վայր «Սևան» բժշկական կենտրոնից ոստիկանության Սևանի բաժին ահազանգ է ստացվել, որ հրազենային վնասվածքներով շտապ օգնության բժիշկների հերթապահ խումբը իրենց մոտ է տեղափոխել 3 քաղաքացու։ Տեղում պարզվել է, որ ստացված օպերատիվ տեղեկությունները հավաստի էին։
Մանրամասն՝ սկզբնաղբյուր կայքում։
Սառնակունք-Սիսիան ճանապարհին բախվել են «Hyundai Elantra»-ն և Նիվան. կա 1 զոհ, 5 վիրավոր
Այսօր՝ մարտի 27-ին, խոշոր ու ողբերգական ավտովթար է տեղի ունեցել Սյունիքի մարզում: Ժամը 10:00-ի սահմաններում Երևան-Մեղրի ավտոճանապարհի Սիսիան-Սառնակունք հատվածում բախվել են «Hyundai Elantra» և «ՎԱԶ 2121» մակնիշի ավտոմեքենաները:
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, 5 հոգի տարբեր աստիճանի մարմանական վնասվածքներով տեղափոխվել են «Սիսիան» բժշկական կենտրոն:
Առավել մանրամասն՝ սկզբնաղբյուր կայքում։
Հայաստանի նոր պատասխանատվության թիմը կհաստատի Նիկոլի ասածը, որ գնում ենք ականապատված դաշտով. Հովհաննիսյան
Ե՞րբ կգնա Նիկոլը, ու կգա նոր փուլ. մաս 2
Բոլոր սոցհարցումները ցույց են տալիս, որ երկրում կա փոփոխությունների մեծ պահանջ։
Բայց այսօր հասարակությանն առաջարկվում է «փոփոխությունների» հետևյալ բանաձևը. Նիկոլ՝ նոր աղետով, կամ՝ հնի ռեստավրացիա (գոնե այդպիսին է հասարակության ընկալումը)։ Այդ պատճառով էլ մարդիկ փակվել են իրենց տներում։
Նստել ու սպասել Նիկոլի գնալուն ու նորմալ մարդկանց իշխանության գալուն՝ նույնն է, թե նստել ու սպասել հետագա աղետներին։ Փոփոխությունը գալու է, երբ մենք մարդկանց պարզ ասենք՝ ի´նչ ենք անելու, ի´նչ ենք առաջարկում մեր ժողովրդին՝ Նիկոլի գնալուց հետո, և վերջապես՝ ովքեր ենք «մենք»։ Լուծումը նոր քաղաքական միտքն է՝ Հայաստանի հետպատերազմական վերականգնման նոր փաթեթ, նոր տեսլական ներկայացնող ուժեր, որոնք նաև կստանձնեն այդ փաթեթի իրականացման պատասխանատվությունը։ Այդ մարդիկ պետք է նոր ձևաչափերով, նոր ասելիքով, նոր գաղափարներով խոսեն նախ՝ իրար հետ և հետո՝ հասարակության հետ: Զրո էմոցիա, զրո գավառական հայրենասիրություն, միայն ռացիոնալ-սառը ծրագրեր։ Մարդկանց պետք է ազատել հետոյի անորոշությունից։ Երբ քաղաքացին հասկանա, թե իր հետ, իր ընտանիքի հետ ինչ է լինելու, պետության հետ ինչ է լինելու, կդադարի վախենալ անորոշությունից և վերջապես դուրս կգա տնից։
Մնացել է կես քայլ
Իրականում ապագայի պատասխանատվության թիմերի ձևավորմանը մնացել է կես քայլ։ Ողբերգական կյանքը ստիպեց, որ հընթացս ձևավորվի նոր անվանացանկ՝ սկզբունքային, գրագետ, պարկեշտ մարդկանցից (կամ՝ ծանոթ դեմքեր նոր պայմաններում հանդես եկան նոր որակներով), մարդկանց, որոնց կյանքի իմաստն այլևս միայն պետություն պահելն է։ Այս մարդկանց թիվը բավականին մեծ է. նրանց կգտնենք հանրային հարթակներում, եկեղեցում, ցավոք՝ նաև բանտերում։ Վերջին դժվար կես քայլի վրա ենք։ Պետք է հաղթահարենք մի շարք տեսանելի և կռահելի արգելքներ.
1. Ներքին խանդ, խարդավանք
2. Չհիմնավորված անձնական ամբիցիաներ
3. Ռեսուրսի բացակայություն
Իհարկե, պետք է ընդունել, որ ոչ բոլորն են ազնիվ ու ոչ բոլորի համար է պետական շահը զբաղեցնում առաջին հորիզոնականը։ Իհարկե, կան դեպքեր, երբ անձնական բարեկեցությունը կամ գույքն են առաջին տեղում։ Խնդիր կա նաև չհիմնավորված ամբիցիաներ ունեցողների հետ, ինչը խանգարում է լայն ու բազմազան շրջանակների միջև առողջ գործընկերային հարաբերություններ ստեղծելուն։ Այս երկու խնդիրն էլ կարելի է լուծել պրոցեսի հենց սկզբից՝ խաղի ճիշտ կանոններ ֆիքսելով և խստորեն պահելով դրանք։
Հայաստանի նոր պատասխանատվության թիմը կհաստատի Նիկոլի ասածը, որ մենք, այո, գնում ենք ականապատված դաշտով, և գուցե իրոք կա միայն մեկ ճիշտ ճանապարհ, բայց կֆիքսի, որ դաշտը թո’ւրքը չի ականապատել։ Հայաստանի նոր պատասխանատվության թիմը պետք է փոխի հանրային դոմինանտ գիտակցությունը. մեր աղետների պատճառը թուրքը չէ, թուրքին հնարավոր է կանգնեցնել, բայց հային կանգնեցնելու ձևը չենք գտնում։ Ներքին փոփոխություն է պետք, որի մարդկային ռեսուրսը կա։ Պայքարի մյուս, նյութական ռեսուրսների մասին՝ հաջորդիվ։
Վահե Հովհաննիսյան
Այլընտրանքային նախագծեր խումբ
Ժողովուրդը ոչ թե տուգանքի ապարատ է, այլ արդեն կոնկրետ վերածվել է կթու կովի
Սևան Աղաջանյանը ֆեյսբուքյան իր էջում գրում է․
Ժողովուրդը ոչ թե տուգանքի ապարատ է, այլ արդեն կոնկրետ վերածվել է կթու կովի։
Սա Չարենցավանի 10 միլիոնանոց տոնածառն է, իր ողջ շուքով։ Անգամ խաշած հավն էլ կհաստատի, որ սա բյուջեի յուրացման հերթական դեպքն է։
Ախր էս նիկոլները աննկարագրելի ագահ լրբի տղերք են։
Իսկ ժողովրդին մնում է միայն գլուխները կախ վճարել հարկերն ու տուրքերը և անհամբեր սպասել նիկոլի ասած ապագային։
Վարդենյաց լեռնանցքում տեղ-տեղ առկա է մերկասառույց, Դիլիջանի ոլորաններում ձյուն է տեղում
Հայաստանի Հանրապետության տարածքում կա փակ ավտոճանապարհ։
Փակ է Արագածոտնի մարզում «Ամբերդ» բարձր լեռնային օդերևութաբանական կայանից Քարի լիճ տանող ավտոճանապարհը։
Վարդենյաց լեռնանցքում տեղ-տեղ առկա է մերկասառույց։
«Մեղրու սար» կոչվող հատվածում և Դիլիջանի ոլորաններում տեղում է ձյուն։
Գորիս քաղաքում մառախուղ է։
Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բեռնատարների համար։
Վրաերթի ենթարկված 49-ամյա տղամարդը հիվանդանոցում մահացել է
Դեկտեմբերի 7-ին «Մերսեդես» մակնիշի մեքենայի վարորդը Երևանի Չարենցի փողոցում վրաերթի էր ենթարկել 49-ամյա Ռադիկ Միքայելյանին, որը մարմնական վնասվածքներով տեղափոխվել էր հիվանդանոց:
Դեկտեմբերի 8-ին հիվանդանոցից հաղորդում է ստացվել, որ նա մահացել է:
Կատարվում է նախաքննություն:
Հակառակորդը ականանետ է կիրառել Արցախի ՊԲ դիրքերից մեկի ուղղությամբ
Մայիսի 30-ին Ադրբեջանի ԶՈւ-ն շփման գծի հյուսիսային և արևելյան ուղղությամբ խախտել է հրադադարը` կիրառելով հրաձգային զենք և ականանետ։
Ժամը 11։40-ի սահմաններում ադրբեջանական կողմը, նախնական տվյալներով, 60 մմ տրամաչափի ականանետից 7 ական է արձակել ՊԲ դիրքերից մեկի ուղղությամբ։
Հայկական կողմը կորուստներ չունի։ Հրադադարի խախտման մասին հաղորդվել է ՌԴ խաղաղապահ զորակազմի հրամանատարությանը։ Մայիսի 30-ի ժամը 13։00-ի դրությամբ իրավիճակը շփման գծում հարաբերականորեն կայուն է։