Ադրբեջանը մասնակիորեն վերականգնել է Հայաստանից Արցախ գազամատակարարումը
Ադրբեջանը մասնակիորեն վերականգնել է Հայաստանից Արցախ գազամատակարարումը, որը արգելափակել էր փետրվարի 8-ին: Այս մասին հայտնում են Արցախի տեղեկատվական շտաբից:
Հաշվի առնելով մատակարարվող գազի ոչ բավարար ծավալը՝ առայժմ գազը կմատակարարվի Ստեփանակերտ քաղաքի բաժանորդ-բնակիչներին:
Գազի բավարար ճնշումը ապահովելուց հետո, ուշ երեկոյան նախատեսվում է վերականգնել մայրաքաղաքի և շրջկենտրոնների գազալցակայանների մատակարարումը:
«Արցախգազ» ընկերությունը հորդորում է լինել ուշադիր և պահպանել անվտանգության կանոնները:
Դրամական աջակցություն է ցուցաբերվում Արցախի շրջափակման հետևանքով դեկտեմբեր-հունվարին աշխատանքից զրկվածներին
Արցախի Հանրապետության կառավարության որոշման համաձայն՝ մեկնարկել է Արցախի Հանրապետության շրջափակման սոցիալ-տնտեսական հետևանքների մեղմացման 2-րդ միջոցառումը, որի պատասխանատուն Արցախի Հանրապետության սոցիալական զարգացման և միգրացիայի նախարարությունն է։
Գերատեսչությունը ծրագրի վերաբերյալ մանրամասներ է հայտնել․
«Շրջափակման սոցիալ-տնտեսական հետևանքների մեղմացման երկրորդ միջոցառման շրջանակներում դրամական աջակցություն կցուցաբերվի Արցախի Հանրապետությունում փաստացի բնակվող այն անձին, ով առնվազն 2022 թվականի նոյեմբերի 1-ից անընդհատ աշխատանքային կամ քաղաքացիաիրավական հարաբերությունների մեջ է գտնվել Արցախի Հանրապետության կառավարության կողմից հաստատված ոլորտներից որևէ մեկում գործունեություն իրականացնող տնտեսավարող սուբյեկտի հետ և 2022թ. դեկտեմբերի 12-ից մինչև 2023թ. հունվարի 31-ը (ներառյալ) ընկած ժամանակահատվածում ազատվել է աշխատանքից կամ դադարեցվել է (լուծվել, դադարել է) քաղաքացիաիրավական պայմանագիրը»,- նշված է Արցախի Հանրապետության սոցիալական զարգացման և միգրացիայի նախարարության տարածած հաղորդագրությունում։
Առևտրի կենտրոնից ջինսե տաբատ ու զգեստ է գողացել․ Քրեական հետախույզներն են բացահայտել
Ոստիկանության Երևան քաղաքի վարչության քրեական հետախույզները անձնական ունեցվածքի գողության վերաբերյալ օպերատիվ տեղեկություն են ստացել, որն իրացրել են Մալաթիայի բաժնի քրեական հետախույզների հետ:
Փետրվարի 14-ին Ծիծեռնակաբերդի խճուղու առևտրի կենտրոնում հայտնաբերել, գողություն կատարելու հիմքով ձերբակալել և Մալաթիայի բաժին են տեղափոխել Արմավիրի մարզի Նալբանդյան գյուղի բնակիչ, 21-ամյա մի աղջկա
Անձնական խուզարկությամբ նրա մոտ հայտնաբերվել են ջինսե տաբատ և կանացի զգեստ: Բերման ենթարկվածը հայտնել է, որ հայտնաբերվածը գողացել է առևտրի կենտրոնի խանութ-սրահից:
Բացատրական աշխատանքի արդյունքում նա հայտնել է, որ 2022 թ. դեկտեմբերին ևս նույն խանութ-սրահից գողություն էր արել, ինչպես նաև 2022 թ. ընթացքում գողություններ էր արել Արշակունյաց պողոտայի առևտրի կենտրոնից:
Կատարվում է նախաքննություն:
Բնակարանը տաքացնելուն զուգահեռ՝ չմիացնել խոշոր այլ սարքավորումներ. «Արցախէներգոն» զգուշացնում է
Արցախում էներգետիկ համակարգի ծանրաբեռնվածությունը վերջին օրերին կտրուկ ավելացել է. Ստեփանակերտի տարբեր հատվածներում շղթայական վթարներ են տեղի ունենում: Նման արագությամբ աճող վթարների քանակը ուղղակի անհնար է դարձնում հովհարային անջատումների ժամանակացույցը պահպանելը:
«Ցանցի վիճակը բավականին ծանր է, ավելի ծանր, քան նախորդ ժամանակահատվածի հետ համեմատ: Վթարների քանակը բավականին մեծացել է: Այն հիմնականում կախված է գազամատակարարման բացակայության հետ և կտրուկ աճ է արձանագրվել: Հիմնականում խոսքը գնում է Ստեփանակերտ քաղաքի մասին, շրջաններում լուրջ խնդիրներ, համենայնդեպս, չենք արձանագրել: Միայն Մարտունի քաղաքում այս պահին ունենք խոշոր վթար, վերացման ընթացքում է: Հուսով ենք կարճ ժամանակում կկարգավորվի»,-Արցախի հանրային հեռուստաընկերությանն ասել է «Արցախէներգո» ՓԲԸ գլխավոր տնօրենի տեղակալ Տիգրան Գաբրիելյանը։
Վթարների հիմնական պատճառը մալուխային տնտեսության վիճակն է: Համակարգը ի սկզբանե վատ վիճակում չէր: Սակայն, ըստ Գաբրիելյանի, այսօրվա պես ծանրաբեռնվածություն Ստեփանակերտ քաղաքում երբեւէ չի եղել: Օրական 60-70 միայն անհատական կանչ է գրանցվում, ավելի խոշոր վթարներ ևս տեղի են ունենում:
«Ստեփանակերտ քաղաքը բավականին ծանրաբեռնված է արդեն երրորդ օրը: Հատկապես ծանր էր կիրակի օրը, վթարների քանակը ահավորը շատացել էր, և հատվածներ ունեինք, որ շատ երկարատև հոսանքազրկված էր խոշոր վթարի պատճառով: Նորից պիտի կոչ անեմ բաժանորդներին, տաքացնելու հետ զուգահեռ խոշոր այլ սարքեր չմիացնել, որովհետև ուղղակի չի դիմանում ցանցը»,-նշել է նա։
Շրջափակման 2 ամսվա ընթացքում Ադրբեջանը 7 անգամ անջատել է Արցախի գազամատակարարումը: Փետրվարի 8-ից առ այսօր այն դեռ դադարեցված է մնում: Գազամատակարարման բացակայության պայմաններում և օդային գծերի բեռը թեթևացնելու նպատակով՝ հովհարային անջատումների ժամանակացույցում փոփոխություններ տեղի ունեցան: Ըստ այդմ՝ անջատումները օրական 6 անգամ են` 1-ական ժամով: Այս պահին նոր փոփոխություններ դեռ նախատեսված չեն:
«Առաջին օրերը լուրջ դրական դինամիկա էր նկատվում, մասնավորապես՝ վթարների քանակը 10 անգամ նվազել էր նախորդ գրաֆիկի համեմատ, սակայն քանի որ եղանակային պայմանները կտրուկ փոփոխվել են, նաև գազամատակարարումն է դադարեցվել, ժամանակ է պետք, որպեսզի կարողանանք հասկանանք, բայց մենք համոզված ենք, որ 1-ժամյա անջատումը ավելի թեթև է լինելու՝ և՛ բաժանորդի համար, և՛ ցանցի համար»,-ասել է «Արցախէներգո» ՓԲԸ գլխավոր տնօրենի տեղակալը։
Հայաստանից Արցախ եկող բարձրավոլտ էլեկտրագիծը վթարված է հունվարի 9-ից, և Արցախը շարունակում է օգտագործել միայն ներքին ռեսուրսները:
«Ամեն օր մենք սպառում ենք մեր պաշարները, ինչքան բեռը բարձրանում է, այնքան քիչ է մնում մեր պաշարները հետագայի համար: Հնարավորինս տնտեսելով և հովհարային անջատումներով պիտի փորձենք ինչքան հնարավոր է երկարատև պիտի կարողանանք մնալ գոնե այս ժամանակացույցում»,-ասում է Տիգրան Գաբրիելյանը։
Գազամատակարարման ու էներգամատակարարման համակարգում առաջացած խափանումների պատճառով՝ Արցախում 120 հազար մարդ, այդ թվում՝ 30 հազար երեխա, շարունակում են ջեռուցման հետ կապված խնդիրներ ունենալ: Գազով ջեռուցվող դպրոցներում 1-8-րդ դասարանների հարկադիր արձակուրդն էլ շարունակվում է:
Ադրբեջանական կողմի կրակոցից ՀՀ ԶՈՒ զինծառայողը ձախ ուսի շրջանում ստացել է հրազենային գնդակային միջանցիկ վիրավորում. քրեական վարույթ է նախաձեռնվել
Ադրբեջանական ԶՈՒ-ի կողմից փետրվարի 14-ին մարտական հենակետում ՀՀ ԶՈւ ժամկետային զինծառայողին հրազենային վիրավորում հասցնելու դեպքի առթիվ քրեական վարույթ է նախաձեռնվել։
«ՀՀ ՔԿ ԶՔԳՎ հինգերորդ կայազորային քննչական բաժին հաղորդում է ստացվել այն մասին, որ 14.02.2023թ.՝ ժամը 18։05-ի սահմաններում, Ադրբեջանի Հանրապետության զինված ուժերի զինծառայողը, ազգային, էթնիկ ծագումով, ատելության, անհանդուրժողականության կամ թշնամանքի շարժառիթով կյանքից զրկելու դիտավորությամբ, կրակոց է արձակել ՀՀ ՊՆ N զորամասի պահպանության տեղամասի՝ Նորաբակ բնակավայրի հատվածում մարտական հենակետի ուղղությամբ:
Կրակոցի հետևանքով նույն հենակետում մարտական հերթապահության ընդգրկված պարտադիր ժամկետային զինծառայող Դ․ Պ․-ն ձախ ուսի շրջանում ստացել է հրազենային գնդակային միջանցիկ վիրավորում։
Դեպքի առթիվ ՀՀ ՔԿ ԶՔԳՎ հինգերորդ կայազորային քննչական բաժնում ՀՀ քրեական օրենսգրքի 44-155-րդ հոդվածի 2-րդ մասի 1-ին և 15-րդ կետերի հատկանիշներով նախաձեռնվել է քրեական վարույթ, նախաքննությամբ պարզվում են դեպքի ամբողջական հանգամանքները»,- ասվում է ՔԿ հաղորդագրությունում։
Լարսի ավտոճանապարհը բաց է բոլոր տեսակի տրանսպորտային միջոցների համար
Փրկարար ծառայությունից տեղեկացնում են, որ Հայաստանի տարածքում կան փակ ավտոճանապարհներ։
Փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները։
Արագածոտնի մարզի ավտոճանապարհներին տեղ-տեղ առկա է մերկասառույց։
Լարսի մասին
Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար:
Վարորդներին խորհուրդ է տրվում երթևեկել բացառապես ձմեռային անվադողերով։
Ողբերգական դեպք Արարատի մարզում․ Արտաշատի հիվանդանոց է տեղափոխվել է 6 ամսական աղջնակի դի. Shamshyan.com
Արարատի մարզում փետրվարի 13-ին ողբերգական դեպք է տեղի ունեցել. ժամը 12։30-ի սահմաններում «Արտաշատ» բժշկական կենտրոնից Ոստիկանության Արտաշատի բաժին ահազանգ է ստացվել, որ մահացած վիճակում իրենց մոտ է բերվել երեխայի դի։
Shamshyan.com-ի հաղորդմամբ, ոստիկաններն ու քննիչները պարզել են, որ մահացածը Արտաշատ քաղաքի բնակիչ 6 ամսական Ռոմեալա Ա․-ն է, ով նույն օրը, ըստ հարազատների՝ տանը հանկարծամահ է եղել։
Դեպքի փաստով Արարատի մարզային քննչական վարչությունում սպանություն հատկանիշներով նախաձեռնվել է քրեական վարույթ։
Ջերմաստիճանը կբարձրանա 8–10 աստիճանով․ առաջիկա 5 օրվա եղանակի կանխատեսումը
Հանրապետության տարածքում`
Փետրվարի 15-ի ցերեկը, 16-ին առանձին շրջաններում սպասվում է թույլ ձյուն, լեռնային գոտիներում՝ բուք։ Փետրվարի 17-20-ը սպասվում է առանց տեղումների եղանակ:
Քամին՝ հյուսիսարևմտյան` 4-6 մ/վ: Փետրվարի 15-20-ը սպասվում է քամու ուժգնացում` 17-20 մ/վ։
Օդի ջերմաստիճանը փետրվարի 18-20-ն աստիճանաբար կբարձրանա 8-10 աստիճանով:
Երևան քաղաքում՝
Փետրվարի 15-ի ցերեկը, 16-ին քաղաքի առանձին հատվածներում հնարավոր է թույլ ձյուն։ Փետրվարի 16-ին սպասվում է նաև քամու ուժգնացում` 10-12 մ/վ: Փետրվարի 17-20-ը սպասվում է առանց տեղումների եղանակ։
Հավելյալ 46 հազար եվրոյի գումար «Դիլիջան» ազգային պարկին՝ CNF-ի կողմից
ՀՀ Շրջակա միջավայրի նախարարության կազմում գտնվող «Դիլիջան» ազգային պարկ ՊՈԱԿ-ին Կովկասի բնության հիմնադրամի /CNF/ կողմից հավելյալ գումար է հատկացվել, որը կազմել է 46 հազար եվրո։ Լրացուցիչ ֆինանսավորման անհրաժեշտությունն առաջացել էր եվրո-դրամ փոխարժեքի մեծ տատանումների հետևանքով։
Նշենք, որ մինչ այս, 184 հազար 500 եվրոյի չափով հավելյալ ֆինանսավորում ստացել էին ՇՄՆ կազմում գտնվող ևս երեք ՊՈԱԿ-ներ․ նշված գումարից 103 հազար եվրո հատկացվել էր «Զանգեզուր» կենսոլորտային համալիրին, 65 հազար եվրո՝ «Խոսրովի անտառ» պետական արգելոցին և 16 հազար 500 եվրո՝ «Արփի լիճ» ազգային պարկին։
Վրաստանում 3.3 մագնիտուդով երկրաշարժ է գրանցվել
Վրաստանի արևելքում՝ Թբիլիսիից 59 կմ հեռավորության վրա, 3,3 մագնիտուդով երկրաշարժ է տեղի ունեցել: Տեղեկությունը հայտնում է Վրաստանի Սեյսմիկ մոնիտորինգի ազգային կենտրոնը։
Ստորգետնյա ցնցումները գրանցվել են տեղական ժամանակով 00։02-ին։ Երկրաշարժի էպիկենտրոնը գտնվել է Դմանիս քաղաքի մոտակայքում` 10 կմ խորության վրա:
Վրաստանում նախորդ երկրաշարժը գրանցվել էր փետրվարի 12-ին (3.1 մագնիտուդ)։
Վերջին շրջանում ամենաուժեղ երկրաշարժը (6,2 մագնիտուդ) Վրաստանում տեղի է ունեցել 2022 թվականի փետրվարին: