Շիրակի մարզի 3 դպրոցների ճաշարանները կսկսեն գործել. ՍԱՏՄ
ՀՀ սննդամթերքի անվտանգության տեսչական մարմնի ղեկավարի որոշմամբ՝ վերացվել են Շիրակի մարզի «Գյումրու թիվ 10 հիմնական դպրոց» (ք. Գյումրի), «Հարթաշենի հիմնական դպրոց» (գ. Հարթաշեն) և «Նահապետավանի միջնակարգ դպրոց» (գ. Նահապետավան) ՊՈԱԿ-ներում գործող հանրային սննդի օբյեկտների՝ ճաշարանների, արտադրական գործունեության կասեցումները։
ՀՀ սննդամթերքի անվտանգության տեսչական մարմնի Շիրակի մարզային կենտրոնների տեսուչների կրկնակի ստուգմամբ պարզվել է, որ այս երեք կազմակերպություններում շտկվել են նախկինում հայտնաբերված խախտումները:
Այրվածքներ ստացած զինծառայողներից մեկը վերակենդանացման բաժանմունքից տեղափոխվել է պալատ
Այրվածքներ ստացած զինծառայողներից մեկը վերակենդանացման բաժանմունքից տեղափոխվել է պալատ, հայտնում են ՀՀ առողջապահության նախարարությունից։
Այս պահին ԱՆ Այրվածքաբանության ազգային կենտրոնում բուժում ստացող 3 զինծառայողներից մեկը շարունակում է ինտենսիվ բուժում ստանալ վերակենդանացման բաժանմունքում, բժիշկների գնահատմամբ` նրա առողջական վիճակը ծանր կայուն է:
Մյուս երկու զինծառայողների առողջական վիճակը գնահատվում է միջին ծանրության:
Ստեփանակերտի քաղաքապետարանը վառելափայտ և վառարան է տրամադրում կարիքավոր ընտանիքներին
Ստեղծված իրավիճակն ու եղանակային պայմանները հաշվի առնելով՝ Ստեփանակերտի քաղաքապետարանը վառելափայտի և վառարանի տրամադրման համար մայրաքաղաքի բնակիչներից դիմումներ է ընդունում:
Արցախի տեղեկատվական շտաբից հայտնում են, որ այն քաղաքացիները, որոնք ունեն վառելափայտի կամ վառարանի անհրաժեշտություն, կարող են դիմել Ստեփանակերտի քաղաքապետարան:
Լինում են դեպքեր՝ վառելափայտի համար դիմում են, բայց պարզվում է, որ տվյալ քաղաքացին դրա կարիքը չունի. որպեսզի հերթեր չառաջանան ու ժամանակի վատնում չլինի՝ Ստեփանակերտի քաղաքապետարանը հորդորում է բնակիչներին ներկայանալ միայն այն դեպքում, երբ իրականում վառելափայտի կամ վառարանի կարիք ունեն:
Օպերատիվ շտաբի որոշմամբ է իրականացվում գործընթացը. դիմումատուների ցանկը քաղաքապետարանից ուղարկվում է Ջրային կոմիտե:
Բաքվում Իրանի դեսպանատան աշխատակիցները լքում են դիվանագիտական ներկայացուցչության շենքը. ԶԼՄ
Ադրբեջանական լրատվամիջոցները հայտնում են, որ Բաքվում Իրանի դեսպանատան աշխատակիցները լքում են դիվանագիտական ներկայացուցչության շենքը։
«Շենքից մի քանի դիվանագետներ շտապելով դուրս վազեցին՝ փաստաթղթեր տանելով։ Շենքի տարածքից դուրս եկավ դեսպանատանը պատկանող եւս մեկլ մեքենա»,- հայտնում են լրատվամիջոցները։
Ավելի վաղ հաղորդվել էր Իրանում Ադրբեջանի դեսպանատան տարհանման մասին: Հունվարի 27-ի առավոտյան Իրանում Ադրբեջանի դեսպանատան վրա հարձակում էր իրականացվել: Հարձակման արդյունքում մեկ մարդ զոհվել է, երկուսը՝ վիրավորվել։ Ոստիկանության հաղորդմամբ՝ հարձակվողը միջադեպից անմիջապես հետո ձերբակալվել է: Նախնական տվյալներով՝ հարձակման պատճառը անձնական եւ ընտանեկան խնդիրներն են:
ԵՄ յոթ երկրներ դեմ են ԵՄ-ի նոր ֆինանսավորմանը՝ ի պատասխան ԱՄՆ-ի սուբսիդավորման ծրագրի
անաչ արդյունաբերության համար նոր ֆինանսավորում ստեղծելու Եվրահանձնաժողովի ծրագրերը բախվում են աճող դիմադրության, քանի որ ԵՄ յոթ երկրներ բացահայտորեն մերժել են այդ գաղափարը ԵՀ նամակում:
Հունվարի 26-ի նամակը, որին ծանոթացել է Reuters գործակալությունը, ստորագրվել է Չեխիայի, Դանիայի, Ֆինլանդիայի, Ավստրիայի, Իռլանդիայի, Էստոնիայի եւ Սլովակիայի կողմից եւ հասցեագրված է առեւտրի հարցերով Եվրահանձնաժողովի փոխնախագահ Վալդիս Դոմբրովսկիսին։
Գերմանիան, Նիդեռլանդները եւ Բելգիան, թեեւ չեն ստորագրել նամակը, նույնպես դեմ են ԵՄ-ի ցանկացած նոր համատեղ փոխառությանը, ինչը հետագայում ընդլայնում է այն երկրների ցանկը, որոնք, ամենայն հավանականությամբ, դեմ կքվեարկեն նման ծրագրերին, երբ ԵՄ առաջնորդները հանդիպեն փետրվարի 9-10-ը՝ դրանք քննարկելու համար:
Բոլոր 10 երկրներն ասում են, որ ԵՄ-ն պետք է օգտագործի արդեն հաստատված միջոցները, այլ ոչ թե լրացուցիչ գումարները:
ԵՄ պաշտոնյաները հատկապես մտահոգված են, որ ԱՄՆ-ի՝ ինֆլյացիայի նվազեցման մասին օրենքը, որն առաջարկում է 369 միլիարդ դոլար սուբսիդիաներ ԱՄՆ-ում էլեկտրական մեքենաներ, մարտկոցներ, հողմային տուրբիններ կամ ջրածին արտադրող ընկերություններին, կգրավի ընկերություններին ԵՄ-ից:
«Կանաչ» արդյունաբերության համար Եվրոպայի գրավչության պահպանման համար պայքարն էլ ավելի է բարդանում էներգակիրների գների պատճառով, որոնք ԵՄ-ում շատ ավելի բարձր են, քան ԱՄՆ-ում, ինչպես նաեւ ԵՄ-ի «կանաչ» ներդրումների թույլտվությունների տրամադրման երկարատեւ գործընթացների պատճառով:
Նամակում յոթ երկրներ հայտարարել են, որ ԵՄ-ն նախ պետք է ծախսեր այն գումարները, որոնք արդեն համաձայնել է հավաքել հետհամավարակային վերականգնման եւ կայունության հիմնադրամի (RRF) միջոցով՝ 800 միլիարդ եվրո դրամաշնորհների եւ էժան վարկերի տեսքով:
«Մենք պետք է ապահովենք, որպեսզի տնտեսությունը կարողանա ավելի լավ տիրապետել ԵՄ արդեն համաձայնեցված ֆինանսավորմանը։ Մինչ այժմ RRF-ի 390 միլիարդ եվրոյի դրամաշնորհներից օգտագործվել է միայն մոտ 100 միլիարդ եվրո: Ցանկացած լրացուցիչ միջոցներ պետք է հիմնված լինեն հանձնաժողովի կողմից ֆինանսավորման մնացած դեֆիցիտի մանրակրկիտ վերլուծության վրա, եւ նոր ֆինանսավորում չպետք է ներդրվի»,-ասել են նրանք։
Գերմանիան, Նիդեռլանդները եւ Բելգիան կիսում են այս տեսակետը՝ մատնանշելով վերականգնման հիմնադրամից չօգտագործված վարկերը, որոնք կառավարությունները չեն պահանջել, քանի որ նախընտրում են դրամաշնորհները:
Հայաստանում կան ընկերություններ, որոնք սկսել են անօդաչուներ արտադրել եւ մատակարարել բանակին. Չալաբյան
Հայաստանում կան ընկերություններ, որոնք սկսել են անօդաչու թռչող սարքեր արտադրել եւ բանակին մատակարարել։ Սա լուծում է ոչ միայն կարճաժամկետ, այլեւ երկարաժամկետ խնդիրներ։ Այս մասին հունվարի 27-ին կայացած քննարկման ժամանակ ասաց հասարակական-քաղաքական գործիչ Ավետիք Չալաբյանը։
Մշտական ճգնաժամային իրավիճակում չգտնվելու համար, ինչը կատարվում է ներկայիս իշխանությունների օրոք, նա կոչ արեց մտածել երկարաժամկետ հեռանկարով խնդիրների լուծման մասին:
«Ինչու Հայաստանը չի կարող կենտրոնանալ բարձր տեխնոլոգիական զենքի արտադրության վրա: Չէ որ Իսրայելին հաջողվեց», – նշեց նա:
Քաղաքական գործիչը կարծում է, որ պետք է հստակեցնել, թե որ երկրներն են Երեւանի դաշնակիցները, եւ ինչպիսի դաշնակից է Հայաստանը հենց այդ երկրների համար։
Նա մատնանշեց անվտանգության համակարգի արագ վերականգնման եւ դիրքային պաշտպանության ռազմավարության վերանայման անհրաժեշտությունը, որն այլեւս չի կարող ապահովել երկրի պաշտպանությունը։
«Անցյալ տարվա սեպտեմբերյան ագրեսիայի ժամանակ Ադրբեջանը կարողացավ համեմատաբար հեշտությամբ վերացնել ստատիկ դիրքերը, իսկ շարժական խմբերի հետ առճակատման ժամանակ ադրբեջանական զինուժը չկարողացավ հաջողության հասնել, քանի որ նախնական տեղեկություն չկար նրանց գտնվելու վայրի մասին եւ այլն։ Սա խոսում է այն մասին, որ մեզ անհրաժեշտ է ավելի շարժունակ բանակ՝ լավ տեղեկացված, լավ կառավարվող, լավ հետախուզությամբ եւ բարձր ճշգրտության զենքերով զինված։
Այս նպատակով ամբողջ բանակի բարեփոխման համար տարիներ կպահանջվեն, իսկ առանձին ստորաբաժանումների համար՝ վեց ամիս կամ մեկ տարի: Սա թույլ կտա վերացնել տեղական սպառնալիքը։ Եթե մենք չենք ուզում անընդհատ դրսից օգնություն խնդրել, ապա պետք է ձեռնարկենք հենց այս միջոցները»,- ասաց Չալաբյանը։
ԵԽԽՎ բանաձևում ներառվել են հայկական պատվիրակության առաջարկները
ԵԽ խորհրդարանական վեհաժողովը հունվարի 26-ին ընդունել է «Առաջընթացը Վեհաժողովի մոնիտորինգային գործընթացներում» (հունվար-դեկտեմբեր 2022թ․) բանաձևը։ Տեղեկությունը հրապարակվել է «Հայաստանը Եվրոպայի խորհրդում» ֆեյսբուքյան էջում։
«Քվեարկությամբ ընդունվեցին բանաձևում հայկական պատվիրակության կողմից առաջարկված փոփոխությունները՝ Ադրբեջանի կողմից հայ ռազմագերիներին անհապաղ ազատ արձակելու և Լաչինի միջանցքի առնչությամբ Մարդու իրավունքների եվրոպական դատարանի միջանկյալ միջոցները կատարելու վերաբերյալ»,– ասված է հաղորդագրությունում։
Բանաձեւի երկրորդ կետում մասնավորապես, ասվում է. «ԵԽԽՎ-ն ի գիտություն է ընդունում Մարդու իրավունքների եվրոպական դատարանի ամենավերջին հրատապ ծանուցումը, որն ուղարկվել է ԵԽ Նախարարների կոմիտե, որը կոչ է անում հետեւել Ադրբեջանի կողմից Լաչինի միջանցքի վերաբերյալ 2022 թվականի դեկտեմբերի 21-ի որոշման կատարմանը, և կոչ է անում անհապաղ եւ ամբողջական կատարել ՄԻԵԴ-ի կողմից ընդունված միջանկյալ միջոցները,
Վեհաժողովը նաև հետևում է հայ ռազմագերիների և գերեվարված քաղաքացիական անձանց շուրջ տիրող իրավիճակին, որոնք դեռևս գտնվում են Ադրբեջանում։ Վեհաժողովը կոչ է անում Ադրբեջանին անհապաղ ազատ արձակել բոլոր ձերբակալվածներին»:
Հիշեցնենք, որ ԵԽԽՎ-ում ՀՀ պատվիրակության անդամ, ԵԽԽՎ տեղական և տարածաշրջանային իշխանությունների հարցերով հիմնական զեկուցող Արմեն Գևորգյանը հունվարի 24-ին և 26-ին ելույթ էր ունեցել «Վեհաժողովի մոնիտորինգի ընթացակարգի առաջընթացը» թեմայով քննարկման ժամանակ:
Նա անդրադարձել է ինչպես Լաչինի թեմային, այնպես էլ փաստահավաք նպատակներով տարածաշրջան ԵԽԽՎ մոնիտորինգի առաքելություն ուղարկելուն։
Գուգարքի ոստիկանները ապօրինի ծառահատման դեպք են բացահայտել
Ոստիկանության Գուգարքի բաժնի քրեական հետախույզները հունվարի 26-ի ժամը 19.30-ի սահմաններում Եղեգնուտ գյուղի վարչական տարածքում ստուգման են ենթարկել «ԳԱԶ-66» մակնիշի մի մեքենա, որը բեռնված էր 5,5 խմ փայտանյութով:
Ոստիկանությունից NEWS.am-ին հայտնում են, որ 27-ամյա վարորդը փայտանյութի օրինականության վերաբերյալ համապատասխան փաստաթուղթ չի ներկայացրել:
Հայտնել է, որ Եղեգնուտ գյուղի հարակից անտառից բենզասղոցի գործադրմամբ ապօրինի հատել է մեկ կանգուն ծառ: Նա ձերբակալվել և ներկայացվել է Լոռու մարզի քննչական վարչություն:
Փայտանյութով բեռնված մեքենան տեղափոխվել է ոստիկանության Գուգարքի բաժնի պահպանվող հատուկ տարածք:
Հունաստանի ԱԳ նախարարը Էրդողանի սադրիչ հռետորաբանությունը համեմատել է Կիմ Չեն Ընի ռեժիմի հետ
Հունաստանի ԱԳ նախարար Նիկոս Դենդիասը Թուրքիայի նախագահ Ռեջեփ Էրդողանի սադրիչ հռետորաբանությունը համեմատել է Հյուսիսային Կորեայում Կիմ Չեն Ընի ռեժիմի հետ, հաղորդում է Greek City Times-ը:
«Մեր հայրենիքը կայունության հենասյունն է եւ էներգետիկ հանգույցը։ Նրանք (Թուրքիան) ուժեղացնում են իրենց սադրիչ պահվածքը Հյուսիսային Կորեայի ոճով սպառնալիքներով, ներառյալ հրթիռներն ու հաղորդագրությունները, որ Հունաստանն իր կղզիներում ինքնիշխանություն չունի, ինչպես նաեւ այսպես կոչված «Կապույտ հայրենիքի» մասին պատմություններով եւ կեղծ պետականությունը արդիականացնելու փորձերով՝ օկուպացված Կիպրոս: Ես կրկնում եմ Հունաստանի դիրքորոշումը Կիպրոսի հարցում։ Մենք չենք դադարի արձագանքել յուրաքանչյուր անօրինական հայտարարության, անօրինական համաձայնագրի եւ մեր դեմ ցանկացած հռետորաբանության: Մենք մեր վրա յուրաքանչյուր հարձակումը կարտացոլենք միջազգային իրավունքի վրա հիմնված փաստարկներով»,-ասել է նա։
Նրա խոսքով՝ «թուրքական ռեւիզիոնիզմը փորձում է խախտել հավասարակշռությունը ավելի լայն տարածաշրջանում»։ «Աշխարհը փոխվել է։ Մենք որպես հիմնական սկզբունք ունենք միջազգային իրավունքը եւ վեճերի խաղաղ կարգավորումը։ Հունաստանը քարոզչությանը չի պատասխանում քարոզչությամբ։ Սա առանձնացնում է ժողովրդավարական աշխարհը ավտորիտարիզմից։ 19-րդ դարի հրետանավակների դիվանագիտության տրամաբանությունը վերացել է»,-ասել է նա։
Դենդիասը հավելել է, որ Թուրքիայում մարդկանց ճնշող մեծամասնությունը ցանկանում է խաղաղություն, կայունություն եւ համագործակցություն, քանի որ դա զարգացում եւ բարգավաճում կբերի տարածաշրջանին, իսկ դա այն է, ինչին ձգտում Է Հունաստանը:
Ճապոնիան եւ Նիդեռլանդները կմիանան ԱՄՆ-ին՝ Չինաստանի համար կիսահաղորդիչների հասանելիությունը սահմանափակելու հարցում
Ճապոնիան եւ Նիդեռլանդները կմիանան ԱՄՆ-ին՝ Չինաստանի համար կիսահաղորդիչների հասանելիությունը սահմանափակելու հարցում՝ հզոր դաշինք ստեղծելով, որը կխափանի միկրոսխեմաներ արտադրելու սեփական ներքին հզորությունների ստեղծման Պեկինի հավակնությունները, տեղեկացրել է Bloomberg-ը՝ հղում կատարելով աղբյուրներին։
ԱՄՆ-ի, Նիդեռլանդների եւ Ճապոնիայի պաշտոնատար անձինք մտադիր են ուրբաթ ավարտել նոր սահմանափակումների վերաբերյալ բանակցություններն այն մասին, թե ինչ կարող է մատակարարվել չինական ընկերություններին, տեղեկացրել են աղբյուրները։ Բանակցությունները Վաշինգտոնում, հինգշաբթի օրվա դրությամբ, շարունակվել են։
Նիդեռլանդները կընդլայնի սահմանափակումները ASML Holding NV-ի համար, ինչը թույլ չի տա նրան արտադրել իր սարքավորման համար խոր ուլտրամանուշակագույն լիտոգրաֆիա, որը կարեւոր նշանակություն ունի առաջավոր չիպերի արտադրության համար, եւ անհնար կդարձնի սեփական արտադրագծերի ստեղծումը։ Ճապոնիան նման սահմանափակումներ կմտցնի Nikon Corp-ի համար։
Համատեղ ջանքերն ընդլայնում են այն սահմանափակումները, որոնք Բայդենի վարչակազմը հրապարակել էր հոկտեմբերին, եւ որոնք ուղղված են սեփական կիսահաղորդիչներ արտադրելու կամ երրորդ երկրներից դրանք գնելու Չինաստանի ունակության սահմանափակմանը։ Այդ երրորդ երկրներում են գտնվում խոշոր ընկերությունները, որոնք կարող էին օգնել միկրոսխեմաների արտադրության հարցում, ներառյալ ASML-ն, ճապոնական Tokyo Electron Ltd-ն եւ ամերիկյան Applied Materials Inc-ը։
Ամերիկյան արտադրողները դժգոհել են, որ Բայդենի վարչակազմի միակողմանի գործողությունները թույլ են տվել օտարերկրյա մրցակիցներին շարունակել աշխատել իրենց արտադրանքի սպառման խոշոր շուկաներից մեկում։
Tokyo Electron-ի արժեթղթերը, որը սարքավորում էր վաճառում Չինաստանում չիպերի արտադրության համար, կորցրել են շահութաբերությունը 1 տոկոսով՝ Bloomberg-ի տեղեկացումից հետո։
Չիպերի չինական արտադրողների արժեթղթերը նույնպես էժանացել են։ Շանհայի Semiconductor Manufacturing International Corp ընկերության արժեթղթերի անկումը հասել է 2,1 տոկոսի, իսկ Hua Hong Semiconductor Ltd-ինը՝ 1,5 տոկոսի։
Չինաստանի օֆշորային յուանը կորցրել է դիրքերը դոլարի հանդեպ՝ թուլանալով 0,1 տոկոսով՝ 6,7 448 ։ Զբոսաշրջությունը եւ սպառման ակտիվացումնամրապնդել են արժույթը լուսնային օրացույցով ամանորյա տոնակատարությունների ժամանակ։
«Սա ԱՄՆ-ի եւ Չինաստանի միջեւ տեխնոլոգիական պատերազմի հաջորդ թեժացումն ավելի նշանակալի կդարձնի եւ կարող է թուլացնել յուանի հանդեպ հարաբերակցությունը կարճաժամկետ հեռանկարում»,- ասել է Սինգապուրի Malayan Banking Berhard-ի արժութային ստրատեգ Ֆիոնա Լիմը։
Չինաստանը պատասխանել է ԱՄՆ-ի ջանքերին։ Դեկտեմբերին Պեկինը Առեւտրի համաշխարհային կազմակերպություն բողոք է ներկայացրել՝ ուղղված ԱՄՆ-ի մտցրած արտահանման վերահսկողության չեղարկմանը։
Անգամ ASML-ի գլխավոր գործադիր տնօրենն է նախազգուշացրել, որ ԱՄՆ-ի պահվածքը կարող է անկանխատեսելի հետեւանքներ ունենալ։ Հունվարի 25-ին գլխավոր տնօրեն Փիտեր Վենինկը հայտարարել է, որ ԱՄՆ-ի մտցրած արտահանման վերահսկողության միջոցները Չինաստանի դեմ կարող են ի վերջո Պեկինին մղել միկրոսխեմաների արտադրության սեփական տեխնոլոգիայի ստեղծմանը։
«Եթե նրանք չկարողանան ստանալ այդ մեքենաները, նրանք իրենք կստեղծեն դրանք»,- ասել է նա Bloomberg News-ի հարցազրույցում։ «Դա ժամանակ կխլի, բայց նրանք, ի վերջո, կհասնեն նպատակին»։