Home Միջազգային Մակրոնն առաջին անգամ խոստովանել է, որ ֆրանսիացի զինվորները սպանել են Ալժիրի անկախության...

Մակրոնն առաջին անգամ խոստովանել է, որ ֆրանսիացի զինվորները սպանել են Ալժիրի անկախության մարտիկին

Նախագահ Էմանուել Մակրոնն առաջին անգամ խոստովանել է, որ ֆրանսիացի զինվորները սպանել են Ալժիրի անկախության հանրաճանաչ մարտիկ Ալի Բումենջելին, հայտնում է AP-ն:

Մակրոնը հանդիպել է Ալի Բումենջելի չորս թոռների հետ եւ «Ֆրանսիայի անունից» խոստովանել, որ փաստաբանը Ալժիրում ձերբակալվել է, խոշտանգվել եւ սպանվել 1957-ի մարտի 23-ին, հայտնում է Ելիսեյան պալատը:

Ֆրանսիայի իշխանությունները նախկինում հայտարարել էին, որ նա ինքնասպանություն է գործել անազատության մեջ գտնվելու ընթացքում՝ սուտ, որի դեմ նրա այրին եւ ընտանիքի մյուս անդամները տարիներ շարունակ պայքարել են, որ հերքեն այն:

«Մեր պատմության երեսին նայելը, ճշմարտությունն ընդունելը թույլ չի տա մեզ բուժել դեռ բաց վերքերը, բայց կօգնի ճանապարհ հարթել ապագայի համար»,- ասվում է Մակրոնի հայտարարության մեջ:

Որպես Ֆրանսիայի առաջին նախագահ, որը ծնվել է հետգաղութային դարաշրջանում, Մակրոնը մի քանի աննախադեպ քայլեր է արել, որպեսի հակադրվի Ֆրանսիայի դաժան պայքարին՝ հյուսիսաֆրիկյան իր գաղութի վերահսկումը պահպանելու համար, որն անկախություն ձեռք բերեց 1962 թվականին:

2018-ին նա խոստովանել է, որ Ֆրանսիան ստեղծել է «համակարգ», որը պատերազմի ընթացքում թեթեւացրել է խոշտանգումները, եւ խոստովանել է, որ Ալժիրում սպանվել է նաեւ ֆրանսիացի մաթեմատիկոս, կոմունիստական ակտիվիստ Մորիս Օդենը, ով պայքարում էր անկախության համար:

Անցյալ հուլիսին նա ֆրանսիացի պատմաբան Բենջամին Ստորին հանձնարարել էր գնահատել, թե ինչպես է Ֆրանսիան վերաբերվել իր գաղութային ժառանգությանը:

Ստորի հունվարյան զեկույցը պարունակում է մի շարք առաջարկություններ, այդ թվում՝ Բումենջելի սպանության ընդունում եւ «հիշողության ու ճշմարտության հանձնաժողովի» ստեղծում, որը կլսի պատերազմից տուժած մարդկանց վկայությունները:

Սակայն սա չէր ենթադրում կառավարության պաշտոնական ներողություն, եւ Մակրոնը ասել էր, որ «ոչ մի զղջում եւ ներողություն» չի լինի, այլ ավելի շուտ «խորհրդանշական գործողություններ»՝ ուղղված հաշտեցմանը:

Բումենջելը ֆրանսախոս ազգայնական իրավաբան եւ մտավորական էր, ով կապող օղակ էր չափավոր UDMA կուսակցության եւ «Ազգային ազատագրման ճակատ» (FLN) դիմադրության ընդհատակյա շարժման միջեւ:

Մակրոնը բարձր է գնահատել նրա «հումանիզմը» եւ «քաջությունը»՝ հավելելով, որ «գաղութային համակարգի անարդարության» դեմ պայքարում Բումենջելի վրա ազդել են ֆրանսիական լուսավորության արժեքները: