Home Միջազգային Պաշտոնական Փարիզն ակնարկում է, որ կառավարությունը չի ընդունի Սենատի բանաձևը

Պաշտոնական Փարիզն ակնարկում է, որ կառավարությունը չի ընդունի Սենատի բանաձևը

Լեռնային Ղարաբաղի անկախության ճանաչումը լուրջ խնդիր է, եւ դրան պետք է մոտենալ հաշվի առնելով բոլոր հնարավոր հետեւանքները: Այս մասին Ֆրանսիայի Սենատում Լեռնային Ղարաբաղի անկախության ճանաչման հարցի քննարկումների ժամանակ հայտարարել է Ֆրանսիայի ԱԳՆ Եվրոպայի եւ արտաքին գործերի հարցերով պետքարտուղար Ժան-Բատիստ Լեմուանը:

Նա նշել է, որ Թուրքիան շարունակում է ապակայունացնող դեր խաղալ, իսկ Հայաստանի վարչապետի եւ Ռուսաստանի ու Ադրբեջանի նախագահների ստորագրած եռակողմ հայտարարությունը բազմաթիվ հարցեր է թողնում, որոնցից ամենակարեւորը կարգավիճակի խնդիրն է: «Բազմաթիվ հարցեր կան, եւ ԵԱՀԿ Մինսկի խմբի ակտիվ մասնակցությունն անհրաժեշտ է: Այս խնդիրները հնարավոր չէ քննարկել միայն Ռուսաստանի եւ Թուրքիայի միջեւ»,- ասել է պետքարտուղարը:

Անդրադառնալով ռազմական հանցագործությունների վերաբերյալ ՄՔԴ դիմելու խնդրին՝ նա նշել է, որ կա իրավասության հարց: Նա հայտարարել է, որ ոչ Հայաստանը, ոչ էլ Ադրբեջանը չեն ստորագրել Հռոմի կանոնադրությունը: Լուծում կարելի է գտնել ՄԱԿ Անվտանգության խորհրդի միջոցով, բայց այնտեղ կան տարաձայնություններ:

«Ճանաչումը լուրջ խնդիր է, եւ պետք է որոշում կայացվի՝ հաշվի առնելով բոլոր հետեւանքները: 1991-ին Լեռնային Ղարաբաղը հռչակել է անկախություն, ոչ մի պետություն դեռ չի ճանաչել այն, նույնիսկ՝ Հայաստանը: Մեր կառավարության պարտականությունն է ինքն իրեն հարց տալ՝ արդյոք այս ժեստը օգտակար կլինի՞ հենց Լեռնային Ղարաբաղի համար»,- ասել է պետքարտուղարը՝ հիշեցնելով Ֆրանսիայի՝ որպես ԵԱՀԿ Մինսկի խմբի միջնորդի պատասխանատվությունը: «Ճանաչումը ոչ ոքի օգուտ չի բերի՝ ոչ Լեռնային Ղարաբաղին, ոչ Հայաստանին, ոչ Ֆրանսիային, ոչ էլ ԵԱՀԿ Մինսկի խմբին: Լուծումը չի կարող լինել միակողմանի ժեստի միջոցով: Բանակցությունները շարունակելու համար կողմերին, ավելի քան երբեւէ, անհրաժեշտ է համանախագահների օգնությունը»,- ասել է պետքարտուղարը: