Home Տնտեսություն Ոսկու գները ռեկորդային բարձր ցուցանիշի են հասել

Ոսկու գները ռեկորդային բարձր ցուցանիշի են հասել

Ոսկու գները բազմամյա ռեկորդ են սահմանել ԱՄՆ Դաշնային պահուստային համակարգի հայտարարության ֆոնին առ այն, որ տնտեսությունը մեծապես կտուժի կորոնավիրուսի համավարակից, իսկ դրա հետեւանքներից վերականգնումը կարող է ավարտվել ոչ շուտ, քան 2021 թվականի վերջին: Այս մասին գրում է Bloomberg-ը՝ վկայակոչելով ամերիկյան կարգավորողի զեկույցը, որը թողարկվում է տարեկան երկու անգամ:

Ոսկու գները, որը ներդրողների կողմից ավանդաբար որպես «անվտանգ ապաստան» է ընկալվում ճգնաժամերի ժամանակ, 2020 թվականին աճել են 16 տոկոսով: Աճը նկատվում է ՀՆԱ-ի աճի դանդաղեցման մասին զեկույցների, մոտալուտ անկման նախազգուշացման եւ ամբողջ աշխարհի կառավարությունների կողմից հակաճգնաժամային ծրագրերի գործարկման ֆոնին: Գների աճին նոր խթան էր հաղորդել ուրբաթ՝ մայիսի 15-ին, տվյալների հրապարակումը, որոնց համաձայն ԱՄՆ-ում արտադրության ծավալները եւ մանրածախ վաճառքներն ապրիլին մեծագույն անկում են ապրել պատմության մեջ:

Մայիսի 18-ին Լոնդոնում աճուրդի ընթացքում ոսկու գինն աճել է 1.2 տոկոսով՝ մինչու 1764.73 դոլար մեկ ունցիայի դիմաց՝ այդպիսով առավելագույն ցուցանիշ սահմանելով 2012 թվականից ի վեր: Աճել են նաեւ հազվագյուտ մետաղի՝ պալադիումի գները: Երկուշաբթի դրա արժեքն աճել է ավելի քան 8 տոկոսով՝ ընդամենը 20 րոպեի ընթացքում ավելանալով 100 դոլարով: Բացասական նորությունների ֆոնին արծաթի գներն աճել են 4 տոկոսով, պլատինինը՝ 3.5 տոկոսով, փոխանցում է «Լենտա»-ն: