Պաշտոնական Երեւանի դաշնակիցները չեն կարող ավելի հայամետ լինել, քան Հայաստանի իշխանությունները. Թեւանյան 

Մյուս պետությունները, այդ թվում՝ պաշտոնական Երեւանի դաշնակիցները, չեն կարող ավելի հայամետ լինել, քան Հայաստանի իշխանությունները։ Այս մասին փետրվարի 3-ին Ազգային ժողովում ընդդիմության նախաձեռնությամբ Ադրբեջանի կողմից Լաչինի միջանցքի արգելափակման թեմայով խորհրդարանական լսումների ժամանակ հայտարարեց «Հայաստան» խմբակցության պատգամավոր Անդրանիկ Թեւանյանը՝ մեկնաբանելով ՌԴ ԱԳ նախարար Սերգեյ Լավրովի կողմից վերջերս արված հայտարարությունը։ Նրա խոսքով՝ բոլորը վշտացած էին այդ հայտարարությունից։ Այնուամենայնիվ, կան կոնկրետ իրողություններ։ «Եթե ՀՀ վարչապետ Նիկոլ Փաշինյանը Պրահայում քառակողմ հանդիպման ժամանակ Լեռնային Ղարաբաղը համարել Է Ադրբեջանի մաս, ապա մնացած բոլոր անձանց հայտարարությունները տեղավորվում են բացառապես այդ շրջանակներում»,-ասաց պատգամավորը: Ինչ վերաբերում է Ալմաթիի հռչակագրի մեկնաբանմանը, ապա, նրա կարծիքով, պաշտոնական Երեւանը պետք է անպայման պնդի, որ հայկական կողմը վերապահումներ ունի: Այս համատեքստում Թեւանյանը հիշեցրեց Պրահայի բանակցություններից հետո Սոչիում կայացած հանդիպման մասին։ «Այդ ժամանակ տեղի ունեցավ Հայաստանի, Ռուսաստանի եւ Ադրբեջանի նախագահների եռակողմ հանդիպումը։ Այնտեղ, մասնավորապես, հայտարարվեց, որ որոշ ձեւակերպումներ չեն ներառվել ամփոփիչ հայտարարության մեջ, իսկ բանակցություններն ինքնին չափազանց բարդ են եղել։ Իմ կարծիքով՝ այդ ձեւակերպումները վերաբերում էին ղարաբաղյան հարցին։ Դրա լուծումն առաջարկվեց հետաձգել։ Առաջարկվեց արձանագրել ղարաբաղյան խնդրի առկայությունը, որն, անշուշտ, անհրաժեշտ է կարգավորել։ Այս կետը չընդունվեց, քանի որ Ադրբեջանի նախագահ Իլհամ Ալիեւը՝ հղում անելով Պրահայում կայացած հանդիպմանը, հայտարարեց, որ Ղարաբաղն արդեն Ադրբեջանի մաս է ճանաչվել։ Այսինքն՝ Ռուսաստանը, որպես միջնորդ, չի կարող առարկել։ Հատկապես, եթե կողմերն արդեն պայմանավորվել են այդ հարցի շուրջ»,-նշեց պատգամավորը։ Ընդդիմադիրը հավելեց, որ Պրահայի հանդիպումը հիմնովին փոխել է ղարաբաղյան կարգավորման տրամաբանությունը։ Նրա խոսքով՝ Պրահայում ոչնչացվեց «Լաչինի միջանցք» հասկացությունը, քանի որ ընդունված հայտարարության տրամաբանության համաձայն՝ եւ՛ Լեռնային Ղարաբաղը, եւ՛ միջանցքը այժմ Ադրբեջանի մաս են կազմում։ «Լավրովն ընդամենը արձանագրել է դա, եւ եթե Հայաստանի իշխանությունները համաձայն չեն դրան, ապա պետք է անհապաղ արձագանքեն։ Ես դեռ ոչ մի արձագանք չեմ տեսել։ Այնպես որ, այս բոլոր իրադարձություններին պետք է նայել հենց այդ համատեքստում»,-կարծում է նա։ Անդրադառնալով Լավրովի այն հայտարարությանը, թե Ադրբեջանը «վերադարձրել է իր տարածքները», Թեւանյանը շտապեց նկատել, որ Հայաստանի բոլոր իշխանությունները պատրաստ էին հարցի լուծմանը, բայց փոխզիջումների հիման վրա։ Նրա խոսքով՝ դա արձանագրվել է եւ՛ Մադրիդյան սկզբունքներում, եւ՛ Կազանի փաստաթղթում։ Այնուամենայնիվ, Հայաստանի իշխանությունները մշտապես բարձրացրել են Լեռնային Ղարաբաղի կարգավիճակի հարցը։