Աբխազիայում տեղատարափ անձրեւները հեղեղել են Գագրան եւ վնասել ՌԴ տանող ճանապարհը
Աբխազիայում հորդառատ անձրեւի պատճառով, որը չորեքշաբթի առավոտյան տեղացել է Գագրա առողջարանային քաղաքում, լեռնային առուները դուրս են եկել ափերից եւ հեղեղել տներն ու ճանապարհները, հայտնել է Հանրապետության արտակարգ իրավիճակների նախարարության մամուլի ծառայությունը:
Ինչպես ճշտում է ԱԻՆ մամուլի քարտուղար Ռոման Լաբիան, ջրի բուռն հոսքերը վնասել են Աբխազիայից Ռուսաստան տանող միակ ճանապարհի ասֆալտապատ ծածկը: Մայրուղով երթեւեկությունը դադարեցվել է երեք ժամով:
«Այս պահին ջուրը սկսել է իջնել։ Երթեւեկությունը մասամբ վերականգնվել է»,-ասել է նա։
Լաբիան հայտնել է, որ տարերքը վնասել է մի քանի առանձնատներ եւ մինի-հյուրանոցներ: Տուժածներ չկան։