Գլխավոր Հասարակություն Վստահ եմ, որ երեխաս ողջ է, եթե նրան բերեն, ես նրան պահողների...

Վստահ եմ, որ երեխաս ողջ է, եթե նրան բերեն, ես նրան պահողների դեմ չեմ բողոքի. անհետ կորած 14-ամյա Հայկ Հարությունյանի մայր

Հունիսի 8-ին տնից անհետացած 14-ամյա Հայկ Հարությունյանի մայրը պնդում է, որ իր երեխան, ով Արարատի մարզի Այնթապ գյուղի իրենց տնից դուրս է եկել և դեռևս չի հայտնաբերվել, ողջ է։

Այս մասին այսօր լրագրողների հետ զրույցում ասաց Հայկ Հարությունյանի մայրը՝ Հասմիկ Հարությունյանը։

«Գնացել եմ աստղաբան Էլյա Հովհաննիսյանի մոտ, նա նայեց աստղերը, մոլորակները և ասաց, որ իմ երեխան ողջ է։ Բացի այդ, գուցե աբսուրդ թվա, գնացի մոմ թափողի մոտ, ով հայտնեց, որ իմ երեխան գտնվում է երեք մարդու մոտ, ովքեր վախենում են պատասխանատվության ենթարկվելուց և այդ պատճառով էլ երեխայիս չեն բերում։ Ես խնդրում եմ, որ բերեն երեխայիս, եթե նրան ողջ-առողջ բերեն, ապա ես չեմ բողոքի»,-ասաց Հասմիկ Հարությունյանը։

Ինչ վերաբերում է իրավապահների աշխատանքին՝ Հասմիկ Հարությունյանն ասաց, որ ոստիկանության շունն իրենց տանից հոտոտելով հասել է մինչև Արարատի ճանապարհ և կանգ առել։

«Ինչ վերաբերում է ոստիկանության որոնողական աշխատանքին, ապա ես հանդիպել եմ ոստիկանապետ Վալերիյ Օսիպյանին, ամեն օր զանգում և զրուցում եմ, ասում է, որ իր պրակտիկայում նման դեպք չի եղել։ Շնորհակալ եմ, ոստիկանությունն էլ, Արտակարգ իրավիճակների նախարարությունն էլ, լավ աշխատում են»,-ասաց նա։

Հասմիկ Հարությունյանի խոսքով՝ ինքը զգում է, որ երեխան ողջ է, բացի այդ, եթե նա դրսում լիներ կհայտնաբերեին, անգամ դի չկա։

Ինչ վերաբերում է այն խոսակցություններին, թե ինքը լվացել է որդու շորերը, ասաց, որ դա իր մյուս երեխայի՝ կրկին աուտիզմով տառապող դստեր շորերն են եղել։

Նշենք, որ հունիսի 8-ին ոստիկանությունում հաղորդում է ստացվել, որ 2004 թ. ծնված Հայկ Հարությունյանը դուրս է եկել տնից և չի վերադարձել:

Հունիսի 18-ին Արարատի մարզի դատախազությունում հարուցվել է քրեական գործ ՀՀ ՔՕ-ի 104-րդ հոդվածի 1-ին մասի հատկանիշներով՝ սպանություն։ Նշենք, որ եթե անձը համարվում է անհետ կորած և սահմանված ժամկետում նրա գտնվելու վայրը հայտնի չի դառնում, սպանության հատկանիշներով հարուցվում է քրեական գործ և կատարվում է քննություն:

 

Comments
SHARE